2018 წელს ნეტფლიქსმა სატელევიზიო შოუების მოყვარულებს ახალი თამამი პროექტი წარუდგინა: ათეპიზოდიანი საშინელებათა ჟანრის სერიალი The Haunting of Hill House. ამ სატელევიზიო შოუს წარმატება თავდაპირველად საეჭვო ჩანდა: კინოსამყაროში საშინელებათა ჟანრი ძირითადად არასერიოზულად აღიქმება და თანაც, მართლა იშვიათად იღებენ კარგ ჰორორებს თანამედროვე კინემატოგრაფიაში.

შესაბამისად, მით უფრო ნაკლებად სავარაუდო იყო, რომ ათი ერთსაათიანი ეპიზოდის მქონე სერიალი თავისი მუხტით, სცენარითა და სათანადო ემოციებით მაყურებლებს მოხიბლავდა.

ამ შესაძლო რისკების მიუხედავად, ახალი შოუს შემქმნელებმა ყოველგვარ მოლოდინს გადააჭარბეს და მართლაც შესანიშნავი პროდუქტი შექმნეს. ჰილჰაუსის მოჩვენება, რომელიც შირლი ჯექსონის ამავე სახელწოდების მქონე ცნობილი ნაწარმოების მიხედვით გადაიღეს, არა მარტო თავისი ჟანრის საამაყო წარმომადგენელია, არამედ დამოუკიდებლადაც სრულყოფილი ნამუშევარია, რომელმაც წარმოუდგენლად საშიშ ისტორიასთან ერთად, საოცრად ემოციური ოჯახური ტრაგედია გააცოცხლა ეკრანებზე.

ფოტო: Netflix

ამის გათვალისწინებით სერიალი შესაბამისადაც დაფასდა და მაშინვე მილიონობით მაყურებელი მიიზიდა. იმის გამო, რომ ჰილჰაუსის მოჩვენება ნეტფლიქსის ერთ-ერთი ყველაზე მეტად ნახვადი სატელევიზიო შოუ გახდა, კომპანიამ მალევე დაამტკიცა მისი შემდგომი სეზონის გადაღებაც.

რახან უამრავი მაყურებელი ელოდება მეორე სეზონის გამოსვლას, ახლა ყველა იმ ინფორმაციას გაგაცნობთ, რაც ამჟამად მის შესახებ ვიცით:

სერიალი ანთოლოგია იქნება, რაც იმას ნიშნავს, რომ ყოველ შემდეგი სეზონი სრულიად ახალ ისტორიას მოგვითხრობს და ის არ იქნება წინა სეზონის ტრადიციული გაგრძელება, როგორც ეს ძირითადად ხდება სატელევიზიო შოუების უმეტესობაში.

მაგალითად, ანთოლოგიაა ასევე ცნობილი საშინელებათა ჟანრის სერიალი American Horror Story.

მეორე სეზონის პრემიერა 2020 წელს შედგება და მას The Haunting Of Bly Manor ერქმევა. ეს სეზონი ამჯერადაც ერთგვარი ეკრანიზაცია იქნება: სცენარი ჰენრი ჯეიმზის ცნობილი წიგნის, Turn of the Screw-ის მიხედვით დაიწერა, რომელიც, სხვათა შორის, მალე ქართულ ენაზეც (მარწუხებში) გამოიცემა.

ჰენრი ჯეიმზის საშინელებათა ჟანრის მოთხრობა მარწუხებში ინგლისში მცხოვრები ორი დაობლებული ბავშვისა და მათი ახალი აღმზრდელის ისტორიას მოგვითხრობს, რომლებსაც გარდაცვლილი ადამიანების აჩრდილები სდევნიან.

შესაბამისად, ახალ სეზონშიც ძირითადი აქცენტი სწორედ მოჩვენებებზე იქნება.

მეორე სეზონში ახალ სახეებსაც ვიხილავთ, თუმცა ძირითადად უკვე ჩვენთვის კარგად ნაცნობი მსახიობები ითამაშებენ, რომლებმაც პირველ სეზონში შეგვაყვარეს თავი: ჰენრი თომასი, კეტრინ პარკერი, ოლივერ ჯეკსონი, ვიქტორია პედრეტი და კეიტ სიგელი.

სერიალის რეჟისორის, მაიკ ფლენეგანის თქმით, პირველი და მეორე სეზონის ისტორიებს ერთმანეთთან კავშირი არ ექნებათ.

რეჟისორმა ისიც განაცხადა, რომ ახალი სეზონი წინასთან შედარებით გაცილებით საშიში იქნება.

კიდევ უფრო საშიში, ნეტავ, რაღა უნდა იყოს?

თუმცა, ამ კითხვაზე პასუხის გაცემას მხოლოდ სერიალის გამოსვლის შემდეგ შევძლებთ, ამიტომ, ისღა დაგვრჩენია, რომ პრემიერამდე პირველი სეზონი გადავიმეოროთ.