პოტერჰედებო კიდევ ერთხელ მოიკრიბეთ ყურადღება, როულინგმა, Warner Bros.-მა და დევიდ იეტსი, მორიგი გრანდიოზული საჩუქარი მოგვიმზადეს - ჯადოსნურ ცხოველებზე ხუთ ფილმს გადაიღებენ.

თუ აკრამანტული, ბასილისკო, ჰიპოგრიფი და კენტავრები შიშისა და აღტაცების ჟრუანტელს გგვრიდათ ახალი ფილმი შეეცდება უფრო მძაფრი ემოციები მოგანიჭოთ. როგორც ჩანს ფილმზე მომუშავე გუნდს იმდენად დიდი იმედები აქვს, რომ ჯერ კიდევ პირველი ნაწილის გამოსვლამდე, სანამ საზოგადოების გამოხმაურებას და ფილმის შემოსავალს გაიგებენ, მომდევნო ოთხი ფილმის გადაღება დააანონსეს.

თუმცა, არსებობს პატარა ნიუანსი, რომელიც გულშემატკივრებს გულს დაწყვეტს, დაგეგმილია ფილმის გადაღება, მაგრამ წიგნი არ გამოვა. ფილმის სცენარზე თავად ჯოან როულინგი იმუშავებს. თამამად შეგვიძლია ვთქვათ, რომ ჯორჯ მარტინივით საუკუნე არ გაწელავს პროცესს, ვინაიდან მეორე ფილმის სცენარზე მუშაობა უკვე დაიწყო.

ეს ინფორმაცია სიურპრიზი მარტო თქვენთვის არ აღმოჩნდა. ჯადოსნური ცხოველების მსახიობების, გადამღები ჯგუფისა და ფანების შეხვედრაზე, როულინგმა განცხადება მოულოდნელად გააკეთა და მხოლოდ თქვენ კი არა ჯადოსნური ცხოველების მთავარ გმირი ედი რედმეინიც გააოგნა.

შეგახსენებთ, რომ ჯადოსნური ცხოველები ჰარი პოტერის პრიქველია. მოვლენები ჰარი პოტერის დაბადებამდე 70 წლით ადრე ვითარდება. ფილმი ნიუ-იორკის ჯადოქრული სამყაროს ისტორიას გვიამბობს. მთავარი პერსონაჟი ახალგაზრდა მწერალი, მაგი და ზოოლოგი (იმედია ჯადოსნური ცხოველების შემსწავლელებსაც ასე ჰქვიათ) ნიუტ სკამანდერია, რომლის როლიც ედი რედმეინმა მოირგო.

რამდენიმე დღის წინ გამოვიდა ჯადოსნური ცხოველების ტრეილერი, რომელიც როულინგის სამყაროში კიდევ ერთ საინტერესო მოგზაურობას გვპირდება.

ფილმის პრემიერა 18 ნოემბერსაა დაგეგმილი.