ქართველი მეცო-სოპრანო ანიტა რაჭველიშვილი ამბობს, რომ მის მულს, რომელიც მისი მანქანით გადაადგილდებოდა, თავს დაესხნენ. ამის შესახებ რაჭველიშვილმა ფეისბუქზე დაპოსტა.

მისი თქმით, უცხო კაცი მის მულს მანქანაში შუქნიშანზე გაჩერების შემდეგ "შეუხტა".

"გააგდო მანქანიდან და ეგრევე დაძრა მანქანა. აღელვებისგან ვერ მშვიდდებოდა და იქვე გააჩერა. ის მამაკაცი ისევ მივარდა და ჩახტომას ცდილობდა მანქანაში. ამჯერად, მძღოლის მხრიდან. ჩემმა მულმა მოასწრო და კარები ჩაკეტა. ამ ადამიანმა შუშაზე ბრახუნი და ღრიალი განაგრძო. უყვიროდა გამიღეო. ბოლოს მოიკრიბა ძალები, დაქოქა მაქანა და გაიქცა. შეშინებული და აბსოლუტურ შოკში", — ყვება რაჭველიშვილი.

მისი ფეისბუქპოსტიდან ირკვევა, რომ ამ ინციდენტს შეესწრო პოლიცია, თუმცა რეაგირება არ ჰქონია:

"ბრავო ჩვენს უმაქნის პოლიციას და ბრავო სუფრაზე ვაჟკაცები ვინც ხართ და ქუჩაში ლაჩრები! აი ეს არის ეს ხელისუფლება! აი ამ ფორმით მოქმედებს უკვე! უბრალოდ ის არ იციან რომ მე ვერაფრით შემაშინებენ!"

შინაგან საქმეთა სამინისტროს ინფორმაცით, საქმეზე მუხლი სისხლის სამართლის კოდექსის 126-ე მუხლის პირველი ნაწილით დაიწყო. ამ მუხლით ძალადობა, რამაც დაზარალებულის ფიზიკური ტკივილი გამოიწვია, ისჯება ჯარიმით ან საზოგადოებისათვის სასარგებლო შრომით ან შინაპატიმრობით ვადით ექვსი თვიდან ერთ წლამდე ანდა თავისუფლების აღკვეთით ვადით ერთ წლამდე.