3 ნოემბერს, ექსპო ჯორჯიაში, მოხალისეთა ჰაბი და ახალგაზრდა ევროპელი ელჩები, Forbes Woman-სა და სულაკაურის გამომცემლობასთან პარტნიორობით ქალთა გაძლიერების მიზნით გაერთიანდება.

ღონისძიებაზე "უსაზღვრო შესაძლებლობები," ასობით გოგონას წინაშე, 15-მდე მომხსენებელი წარდგება და მათ ევროკავშირის მიერ შემოთავაზებულ საგანმანათლებლო თუ მოხალისეობრივ პროექტებზე მიაწვდის ინფორმაციას.

როგორ მოვიპოვოთ დაფინანსება ევროპის წამყვან უნივერსიტეტებში? როგორ მოვიძიოთ სამუშაო ადგილები ან გავიაროთ ანაზღაურებადი სტაჟირება ევროპაში? – ამ და სხვა კითხვებზე პასუხებს, ოფიციალურ წარმომადგენლებთან ერთად, სხვადასხვა პროგრამის ბენეფიციარი გოგოები პირადი გამოცდილების საფუძველზე გასცემენ.

ღონისძიების მიზანია ქალების გაძლიერება, ხელშეწყობა და მათი ჩართულობის ზრდა სხვადასხვა ტიპის საგანმანათლებლო პროექტებში. ორგანიზატორებს სურთ, საზოგადოებას აჩვენონ, რომ ქალთა შესაძლებლობები უსაზღვროა და ევროკავშირი მათ განვითარებისთვის მრავალ საშუალებას სთავაზობს.

ღონისძიების ფარგლებში, სულაკაურის გამომცემლობის წარმომადგენლები ჩაატარებენ ახალი წიგნის, მებრძოლი ქალების პრეზენტაციას და ისაუბრებენ წიგნის გამოცემის მიზნებსა და შინაარსზე.

საგანმანათლებლო-საინფორმაციო შეხვედრას ექსპო ჯორჯია, კვირას, 3 ნოემბერს, 12:00-დან 16:00 საათამდე, მესამე პავილიონში უმასპინძლებს.