კასპის მუნიციპალიტეტში, სოფელ ნიგოზას მიმდებარედ ქარის ახალი ელექტროსადგური აშენდება, რომელიც დამატებით დაახლოებით 200 მლნ. კილოვატსაათ ელექტროენერგიას გამოიმუშავებს. ამის შესახებ ეკონომიკისა და მდგრადი განვითარების მინისტრმა მთავრობის სხდომის შემდეგ ისაუბრა.

თურნავას განცხადებით, დღეს, პირველი ნოემბრის მთავრობის სხდომაზე ქარის ახალი ელექტროსადგურის განვითარების კონცეფცია დამტკიცდა.

"ძალიან მნიშვნელოვანი პროექტია და მნიშვნელოვანია არა მხოლოდ იმიტომ, რომ ეს ადგილობრივ რესურსზე დამყარებული ელექტროენერგია იქნება, არამედ იმიტომაც, რომ ჩვენ კიდევ ერთი ნაბიჯი გადავდგით უფრო მწვანე, დივერსიფიცირებული, განახლებადი ენერგოსექტორის დამკვიდრებისკენ", — აღნიშნა ეკონომიკისა და მდგრადი განვითარების მინისტრმა.

ეკონომიკის მინისტრი დარწმუნებულია ნიგოზას პროექტის წარმატებაში:

"არ გვაქვს ფუფუნება, რომ ნებისმიერი განახლებადი ენერგიის პროექტი ხანგრძლივად გაიწელოს — როგორც იცით, მატულობს მოთხოვნა, დეფიციტი, იმპორტი და ჩვენ ყველა ღონე უნდა ვიხმაროთ, რომ ძალიან სწრაფად განვავითაროთ, ჰიდროსადგურები იქნება, თუ ქარის ელექტროსადგურები", - აღნიშნა ნათია თურნავამ.

ეკონომიკის მინისტრის განცხადებით, პროექტით დაინტერესებულია თურქული კომპანია ჩალიკი, რომელიც კვლევებშიც იყო ჩართული. მინისტრის ინფორმაციით, კომპანიასთან მოლაპარაკებები იგეგმება.