საქართველოს მეოთხე პრეზიდენტმა, გიორგი მარგველაშვილმა ილია მეორესთან შეხვედრის შემდეგ თქვა, რომ პატრიარქს ზუსტად ისეთივე თვალები ჰქონდა, როგორც იმ 40 წლის განმავლობაში, რაც ის ამ თანამდებობაზეა. მან თქვა, რომ მეუფე პეტრე პატრიარქის "პიდარასტიის ცოდვით შეპყრობილად" "ზურგის" ინტერესების გარეშე არ მოიხსენიებდა.

"მე დავინახე თვალები, რომელიც ვერ გატეხა ვერც კაგებემ და ვერც სპეცსამსახურებმა... როდესაც ასეთი ტიპის განცხადებები კეთდება, ეს განცხადებები არც ერთ შემთხვევაში არ კეთდება გულწრფელი გაბრაზებით ან აღშფოთებით. არ ხდება ხოლმე ასეთი განცხადებების გაკეთება ზურგისა და ზურგს უკან ინტერესების გარეშე", — თქვა მარგველაშვილმა და კონკრეტიკისგან თავი შეიკავა.

დღევანდელი, 31 ოქტომბრის სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი". მოგვიანებით მეუფემ განმარტა, რას ნიშნავს სიტყვა "პიდარასტია" და პატრიარქი "ჭაბუკების გახრწნაში" დაადანაშაულა.

სინოდის განცხადებით, მეუფე პეტრეს ცოდვის მოუნანიებლობის გამო შეუჩერეს მღვდელმსახურების უფლება და მონასტერში წასვლისკენ მოუწოდეს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.