თბილისის მერის მოადგილე, ირაკლი ლექვინაძე განმარტავს, რომ შესაბამისი სამსახურები მზად არიან ბოტანიკური ბაღთან დაკავშირებით საუბრისთვის საკრებულოში მივიდნენ:

"მზად ვართ, მივიდეთ საკრებულოში და ყველა დაინტერესებულ მხარეს, იქნება ეს სამთავრობო, არასამთავრობო, მასმედია და ა.შ. დეტალურად, პროფესიულად, საქმიანად ვესაუბროთ ამ პროექტებთან დაკავშირებულ პროცესებზე და არა პოლიტიკურად ანგაჟირებული ფორმით".

დღეს, 6 მაისს, პარლამენტის თავჯდომარემ, დავით უსუფაშვილმა თბილისის მერის კომენტარი იმასთან დაკავშირებით, რომ ის საკრებულოში დეკემბრამდე, თუნდაც ბოტანიკური ბაღის საკითხზე სასაუბროდ, მისვლას არ გეგმავს, გააკრიტიკა:

"ყველაზე მეტად გამაოცა თბილისის მერის, ჩემი დიდი ხნის მეგობრისა და კოლეგის, დავით ნარმანიას პოზიციამ იმის თაობაზე, რომ ის დეკემბრამდე საკრებულოში მისვლას არ აპირებს".

უსუფაშვილის განცხადება თბილისის საკრებულოს წევრმა, ალეკო ელისაშვილმა, უსუფაშვილის მხრიდან ნარმანიას იმპიჩმენტზე პირდაპირ მინიშნებად შეაფასა. მისი თქმით, საკრებულო ხმებს აგროვებს და სულ 17 ხმაა საჭირო იმისთვის, რომ ნარმანია საკრებულოში მივიდეს:

"რესპუბლიკელები მსჯელობდნენ ამაზე. ჭოჭმანობდნენ, რესპუბლიკელების 4 დეპუტატი მოაწერდა თუ არა ხელს. მე ამ განცხადების შემდეგ ეჭვი არ მეპარება, რომ ისინი შეუერთდებიან ნარმანიას დაბარებას [საკრებულოში]".

ჯერჯერობით უცნობია, აპირებს თუ არა თბილისის მერი ზემოაღნიშნულ შეხვედრაზე საკრებულოში მისვლას.