პატრიოტთა ალიანსის ლიდერი, ირმა ინაშვილი ქართული ოცნების წევრებს მოუწოდებს, წინასწარ "პროცენტების ბრახაბრუხისგან" თავი შეიკავონ. ამის შესახებ მან უმრავლესობის წევრებს პარლამენტის პლენარულ სხდომაზე მიმართა.

ინაშვილის განცხადებით, ქართული ოცნება ის ხელისუფლებაა, რომელსაც არაფრის დათმობა და გაყოფა არ უნდა. მისივე თქმით, ასეთი აზროვნება ცუდად მთავრდება.

"როდესაც ემოციურად აცხადებთ ხოლმე, რომ კოალიციას არავისთან არ შექმნით და რაღაც წითელი ხაზები გაქვთ, ჩვენც გვაქვს გავლებული წითელი ხაზი თქვენთან, ვინმე გეხვეწებათ რაიმე კოალიციის შექმნას? ან რაიმე პარტნიორობას? მაგრამ რეალობას უნდა დაელოდოთ 2020 წლის არჩევნებისთვის, რა რეალობა შედგება და ხალხი ვის და რატომ მისცემს ხმას და მერე სხვანაირად აჭიკჭიკდებით, გარწმუნებთ", — თქვა ინაშვილმა.

გუშინ, 28 ოქტომბერს მმართველი გუნდის წევრებმა განაცხადეს, რომ 2020 წლის არჩევნების შემდეგ ქართულ ოცნებას კოალიციის შექმნა არ დასჭირდება.