ე.წ. ციანიდის საქმეზე ბრალდებულ გიორგი მამალაძის ადვოკატის, მიხეილ რამიშვილის თქმით, ეპისკოპოს იაკობის ბრალდებები, ეს არის პირდაპირი მტკიცება, რომ გარკვეული დანაშაული მზადდებოდა. TV პირველის ეთერში, ვახო სანაიასთან ინტერვიუში მიხეილ რამიშვილი ვარაუდობს, რომ დეკანოზი გიორგი მამალაძე "განტევებიც ვაცი" იყო.

"ადამიანმა დაასახელა პირები. მე მიმაჩნია, რომ აბსურდულად არ უნდა მოიხსენიოს ეს განცხადება პრემიერმა. უნდა მოუწოდოს სამართალდამცავი ორგანოები ჩაერთოს, თუ რას ეხება ეს განცხადება... ეტყობა ისეთი რამ იგეგმებიოდა, გარკვეული პირების მიერ, რამაც შეიძლება გარკვეულ პირებს ხელი შეუშალა და მერე განტევების ვაცად, გადაბრალება მოხდა", — ამბობს ადვოკატი.

ბოდბელმა ეპისკოპოსმა იაკობმა ყოფილ პრემიერ, გიორგი კვირიკაშვილის კაბინეტში გამართული შეხვედრა გაიხსენა, სადაც "ეჩალიჩებოდნენ პატრიარქის გადაყენებაზე და შიო მუჯირის პატრიარქად არჩევაზე". მისი თქმით, სახელმწიფო უსაფრთხოების სამსახურის მაშინდელ უფროსთან, ვახტანგ გომელაურთან და გიორგი გახარიასთან ერთად გაიმართა ეს შეხვედრა.

ბოდბელი ეპისკოპოსის მტკიცებით, მას აქვს დოკუმენტები იმაზე, რომ "მეუფე პეტრე და დეკანოზი [გიორგი მამალაძე] ერთად იყვნენ ყველაფერში".

"ვგულისხმობ [პატრიარქის] მკვლელობას", — ამბობს იაკობი და აგრძელებს იმით, რომ არამარტო მეუფე პეტრე, არამედ, ჩარეულები იყვნენ ხელისუფლებიდან და ბიზნესიდან.