თბილისის საქალაქო სასამართლომ თიბისის საქმეზე პროკურატურის მიერ დაქირავებული უცხოელი ექსპერტების ჩვენებები დაუშვებლად ცნო. თიბისის დამფუძნებლების, ბადრი ჯაფარიძისა და მამუკა ხაზარაძის ადვოკატმა თქვა, რომ ამ ჩვენებებს სამართლებრივი დატვირთვა ვერ ექნებოდა.

"არსებული ანგარიშის წარმომავლობა უცნობია და ჩანს რომ ეს დოკუმენტი ბრალდების მხარემ მიიღო საკუთარი მიმართვიდან და მისი მიზანი არაა მოიცვას საქმეში არსებული ყველა გარემოება. არ არის გამოკითხული რა ორგანოა ეს, ვინ შეადგინა ანგარიში", — განმარტა სასამართლომ.

გარდა ამისა, სასამართლომ მიიჩნია, რომ არ უნდა დაკმაყოფილებულიყო პროკურატურის შუამდგომლობა, რომლითაც ბრალდების მხარე იმ მტკიცებულებების დაუშვებლად ცნობას ითხოვდა, რომელიც ჩვენებების სახით დაცვის მხარემ საზღვარგარეთ მოიპოვა.

სხდომის დაწყებამდე თიბისი ბანკის საქმის პროკურორი, არჩილ ტყეშელაშვილი ამბობდა, რომ უცხოელ ექსპერტებს, რომელიც მათ საქმისთვის დაიქირავეს, მსგავს დანაშაულებთან შეხება ჰქონიათ. მისივე თქმით, ის, რომ ექსპერტებმა ქართული კანონმდებლობა არ იციან და მათი შეფასება არაობიექტურია, სიცრუეა.

"უკანონო შემოსავლის ლეგალიზაცია არის ტრანსნაციონალური დანაშაული. ეს დანაშაული და ასეთი შემადგენლობა მოქმედებებს იმ ქვეყნებში, რომლებშიც საქმიანობდნენ ეს ექსპერტები. ერთ-ერთი მათგანი იყო ისრაელის გენერალური პროკურორი და არაერთ გახმაურებულ საქმეზე მონაწილეობდა. მეორე იყო აშშ-ს იუსტიციის დეპარტამენტის ორგანიზებულ დანაშაულთან ბრძოლის სამსახურის ბრძოლის", — თქვა პროკურორმა ჟურნალისტებთან.

დღეს, 25 ოქტომბერს თბილისის საქალაქო სასამართლოში თიბისი ბანკის საქმეზე მორიგი პროცესი მიმდინარეობს.