რემბრანდტი მეჩვიდმეტე საუკუნის მხატვარია, რომელიც, როგორც ჰოლანდიურ ფერწერაში, ისე მსოფლიო ხელოვნების ისტორიაში ერთ-ერთ ყველაზე მნიშვნელოვან მხატვრად მიიჩნევა. ცოტა ხნის წინ სწორედ ამ სახელოვანი მხატვრის აქამდე უცნობი ნახატი აღმოაჩინეს.

2016 წელს ეს ნახატი 1,5 მილიონ ევროდ გამოისყიდეს კერძო მფლობელისგან და მას შემდეგ მას რესტავრაცია უტარდებოდა. ნახატი აქამდე საჯაროდ არ გამოფენილა და მისი ხილვა დამთვალიერებლებს პირველად ქალაქ ოქსფორდში მდებარე ეშმოლის ხელოვნებისა და არქეოლოგიის მუზეუმში შეეძლებათ.

მკვლევარებმა დაადგინეს, რომ ნახატი რემბრანდტს 1620-იან წლებში აქვს შექმნილი და ის მის ადრეულ შემოქმედებას მიეკუთვნება. ამ 122 სანტიმეტრის სიგრძის ტილოს, რომელზეც ერთგვარი ბიბლიური სცენაა გამოსახალი, Let the Little Children Come to Me (მოუშვით ჩემთან ბავშვები) უწოდეს.

ფოტო: Public Domain

აქამდე უცნობი ეს ფერწერული ნიმუში კიდევ იმითაა მნიშვნელოვანი, რომ მასზე თავად მხატვრის, რემბრანდტის ავტოპორტრეტია გამოსახული და კიდევ სხვა რამდენიმე პიროვნების სახე, რომლებიც სხვადასხვა დროს ასევე გამოყენებული აქვს თავის სხვა ნახატებზე.

ეშმოლის ხელოვნებისა და არქეოლოგიის მუზეუმი რემბრანდტის შემოქმედების ერთ-ერთ ყველაზე დიდ გამოფენას აწყობს, სადაც მისი ადრეული შემოქმედებიდან თითქმის ყველა ნახატი იქნება გამოფენილი, მათ შორის მისი ეს ახალი ნახატიც.

დამთვალიერებლებს გამოფენაზე სტუმრობა 2020 წლის 27 თებერვლიდან 7 ივლისის ჩათვლით შეეძლებათ.