ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ კოალიციური მთავრობის ჩამოყალიბება ვერ შეძლო. ნეთანიაჰუმ მანდატი პრეზიდენტს დაუბრუნა.

ნეთანიაჰუ უკვე ათი წელია პრემიერია, თუმცა სექტემბრის არჩევნებში მისმა პარტიამ ლიკუდმა და სხვა მხარდამჭერმა პარტიებმა ისრაელის პარლამენტში ქსენეთში 120 ადგილიდან 61 ვერ მოიპოვა, რაც მთავრობის ჩამოყალიბებისთვის იყო საჭირო. ისრაელის ისტორიის განმავლობაში ქსენეთში უმრავლესობა ვერც ერთმა პარტიამ ვერ მოიპოვა და ყველა მთავრობა კოალიციური იყო.

სექტემბრის არჩევნებში ნეთანიაჰუს პარტიამ მხოლოდ 32 მანდატი მოიპოვა, ხოლო მთავარმა მოწინააღმდეგემ ბენი განცის პარტიამ კახოლ-ლავანმა — 33. ორივე მათგანს შეეძლო, რომ სამთავრობო კოალიცია ჩამოეყალიბებინა და სხვა პარტიების მხარდაჭერა აღარ დასჭირდებოდათ. ნეთანიაჰუ განცს კოალიციას თავისი ხელმძღვანელობით სთავაზობდა, რასაც ოპოზიციონერი არ ეთანხმებოდა. განცს თვითონ სურს პრემიერობა.

ქვეყნის პრეზიდენტმა, რუვენ რივლინმა განაცხადა, რომ ახლა მთავრობის ჩამოყალიბების შანსს ნეთანიაჰუს მთავარ მოწინააღმდეგეს, ბენი განცს მისცემს. თუ განცი მთავრობის ჩამოყალიბებას ვერ შეძლებს, მაშინ ქვეყანაში მორიგი ვადამდელი არჩევნები უნდა ჩატარდეს, რომელიც წელს უკვე მესამე იქნება.