თურქეთის პრეზიდენტმა რეჯეპ ტაეპ ერდოღანმა აშშ-ს პრეზიდენტის, დონალდ ტრამპის მიერ გაგზავნილი წერილი ნაგავში მოისროლა. ამის შესახებ BBC-მ თურქეთის პრეზიდენტთან დაახლოებულმა წყარომ უთხრა.

დღეს, 17 ოქტომბერს მედიაში გასაჯაროვდა აშშ-ს პრეზიდენტის, დონალდ ტრამპის წერილი თურქეთის პრეზიდენტის რეჯეპ ტაიპ ერდოღანის მიმართ, რომელშიც ქურთებთან მორიგებაზეა საუბარი. წერილი 9 ოქტომბრითაა დათარიღებული და ტრამპი ერდოღანს წერს, "არ გაჯიუტდე! ნუ იქნები სულელი!"

9 ოქტომბერს თურქეთმა სირიაში, სასაზღვრო ტერიტორიაზე სამხედრო მოქმედებები სირიელი ქურთების წინააღმდეგ დაიწყო. ტერიტორიას, რომელზეც თურქეთს "უსაფრთხო ზონის" შექმნა სურს, სირიის დემოკრატიული ძალები (SDF) აკონტროლებს, რომლის შემადგენლობაში სახალხო თავდაცვის დანაყოფები (YPG) შედის.

სამხედრო ინტერვენცია მას შემდეგ დაიწყეს, რაც აშშ-მ ჯარების გაყვანის შესახებ განაცხადა. გადაწყვეტილება მოულოდნელი იყო, რადგან სირიელი ქურთები ისლამურ სახელმწიფოსთან ბრძოლაში აშშ-ს მთავარი მოკავშირეები იყვნენ.

თურქული ძალებისგან თავდასაცავად ქურთებმა დასახმარებლად სირიის სამთავრობო ძალებსა და რუსეთს მიმართეს. სირიამ თურქეთის სასაზღვრო ტერიტორიაზე ჯარების განთავსება დაიწყო, ხოლო რუსეთი თურქეთისა და სირიის სამხედრო ძალებს შორის პატრულირებს.