ეროვნული ბანკის ვიცე-პრეზიდენტი, არჩილ მესტვირიშვილი აცხადებს, რომ პროგრეს ბანკის საეჭვო ტრანზაქციების შესახებ ინფორმაცია თიბისი ბანკმა სამართალდამცავებს უნდა ჩააბაროს. საქმე ეხება მთავარი არხის გავრცელებულ ინფორმაციას, რომლის მიხედვით, აუდიტორული დასკვნით, პროგრეს ბანკის ტრანზაქციების ნაწილი ფულის გათეთრების რისკებს შეიცავს.

ვიცე-პრეზიდენტი აცხადებს, რომ ხსენებულ ტრანზაქციებზე ინფორმაცია ეროვნულ ბანკში ვერ მოიძიეს.

"ჩვენ მივმართეთ თიბისი ბანკს, თუ არსებობს ასეთი დოკუმენტი, სამართალდამცავ ორგანოებს გადასცეს. ამასთან, გვაცნობოს ამ დოკუმენტის შესახებ", — ამბობს არჩილ მესტვირიშვილი.

თიბისის დამფუძნებელმა მთავარი არხის ეთერში პროგრეს ბანკის აქციების ყიდვაზე საუბრისას ივანიშვილთან შეხვედრა გაიხსენა. ხაზარაძის თქმით, 2016 წელს, როცა თიბისი ბანკი რესპუბლიკას შეძენას გეგმავდა, ეროვნულმა ბანკმა ტრანზაქცია "ახსნა-განმარტების გარეშე შეაჩერა". მისივე თქმით, ივანიშვილმა მას პროგრეს ბანკის შეძენა თხოვა და დააყოლა, რომ ამ შემთხვევაში იქნებ რესპუბლიკა ბანკის გარიგებაც დასრულებულიყო.

"მოლაპარაკებული ვიყავით სოსიეტე ჟენერალთან, მაგრამ ეროვნულმა ბანკმა ეს ტრანზაქცია გაგვიჩერა... მე ეს გულის ტკივილით, თუ საყვედურის ტონით ვთქვი... ეს ვუთხარი ივანიშვილს. იქ ითქვა ასეთი რაღაც, თუ პროგრეს ბანკსაც იყიდით, იქნებ ეს გარიგება გამოვიდეს", — ამბობს ხაზარაძე და განმარტავს, რომ "რამდენიმე ჯანმრთელი აქტივი" წამოიღეს პროგრეს ბანკიდან.

მამუკა ხაზარაძე მიიჩნევს, რომ ეს საკითხი უნდა გადაეცეს პროკურატურას და ისეთივე ინტენსივობით წარიმართოს გამოძიება, როგორც ეს თიბისი ბანკთან დაკავშირებით ხდებოდა.

პროგრეს ბანკი 2007 წელს კახა კალაძემ დააფუძნა და 100-პროცენტიან წილს ფლობდა. ბანკი 2016 წლამდე, იმ დრომდე ფუნქციონირებდა, სანამ აქტივების ნაწილი თიბისიმ იყიდა. 2012 წლიდან ბანკის 21,79 პროცენტი ბიძინა ივანიშვილს, დანარჩენი რუს ბანკირს, ილია გავრილოვს ეკუთვნოდა. გავრილოვი რუსეთში დიმიტრი მედვედევთან გარიგებაში მონაწილეობდა. დეივ ბლოსისა და ნინო ბაქრაძის სტატიის მიხედვით, რომელიც აიფაქტზე გამოქვეყნდა იგი 2015-2016 წლებში პროგრეს ბანკის საკონტროლო პაკეტს ფლობდა.

მთავარი არხის ჟურნალისტურ გამოძიებას გამოეხმაურა კახა კალაძე და თქვა, რომ ბიძინა ივანიშვილს მხოლოდ ბანკის გაკოტრებისგან გადარჩენა ჰქონდა განზრახული. კალაძე აცხადებს, რომ პროგრეს ბანკს და ქართუს ყოფილი ხელისუფლება ებრძოდა:

"არანაირ გათეთრებებთან პროგრეს ბანკს კავშირი არ ჰქონია და მეორე, თეორიულად რომ წარმოვიდიგნიოთ, ვთქვათ, მართლა რაღაც გადარიცხვები განახორციელა ამ ბანკმა, ბიძინა ივანიშვილი საერთოდ რა შუაშია?... ბიძინა ივანიშვილის შემოსვლა პროგრეს ბანკში განპირობებული იყო მხოლოდ და მხოლოდ ერთი მოტივით, რომ ბანკი გადაერჩინა იმ თაღლითებისა და მოძალადეებისაგან, რომელსაც სააკაშვილის რეჟიმი წარმოადგენდა... ერთადერთი მოტივი, რისთვისაც ივანიშვილმა შეიძინა 22 პროცენტი და რამდენიმე მილიონი გადაიხადა, იყო ის, რომ ბანკი გადაერჩინა და ეს მართლაც ასე მოხდა. სხვა მას არანაირი შეხება არ ჰქონია ბანკთან".