ალასკის სანაპიროებთან მკვლევარებმა პირველად დააფიქსირეს კუზა ვეშაპები, რომლებიც განსაკუთრებული ტაქტიკით ნადირობენ. მეცნიერები ამ ტექნიკას "ფარფლებით ვერტიკალურ მომწყემსვას" უწოდებენ. ასეთი სიზუსტით მისი ფირზე აღბეჭდვა პირველად გახდა შესაძლებელი.

კუზა ვეშაპები სიღრმიდან ამოყვინთვის პარალელურად უბრალოდ პირის ფართოდ გაღებით ნადირობენ, რა დროსაც გზად ნებისმიერ თევზს ნთქავენ. ზოგჯერ ვეშაპები წრიულად იწყებენ ცურვას და ჟანგბადის ბუშტუკების გამოშვებით ერთგვარ წრიულ "ბადეს" ქმნიან, საიდანაც მსხვერპლს გაქცევა უჭირს.

ძალზე ბევრ რამეს ვერ ხედავ, როდესაც ასეთ ცხოველებს ნავიდან აკვირდები

მედისონ კოსმა, ვეშაპთა ბიოლოგი

ვეშაპების ნადირობისა და კვების თავისებურებებზე დასაკვირვებლად მკვლევართათვის დრონის საშუალებით სიმაღლიდან გადაღება იდეალური აღმოჩნდა. მეცნიერთა ჯგუფი 2016 — 2018 წლის შუალედში აკვირდებოდა ამ გიგანტურ ძუძუმწოვრებს და ამ პერიოდში მათ ორი ვეშაპი შენიშნეს, რომლებიც ჰაერის ბუშტუკების "ბადის" შიგნით თევზების ერთ ჯგუფად შესამჭიდროვებლად მუდამ თავიანთ ფარფლებს იყენებდნენ.

"ფარფლებით ჰორიზონტალური მომწყემსვისას" ვეშაპები ჰაერის ბუშტუკების "ბადეს" ქმნიან, სანამ თავიანთი კუდის აქტიური მოძრაობით მისი საზღვრების დავიწროებას დაიწყებენ. "ფარფლებით ვერტიკალური მომწემსვისას" ვეშაპები კვლავ ჰაერის ბუშტუკების "ბადეს" იყენებენ, ოღონდ ამჯერად თავიანთ ფარფლებს მაღლა სწევენ (დაახლოებით ისე, როგორც რაგბის მსაჯები თავიანთ ალამს წარმატებული გარდასახვის შემდეგ) და ამგვარად თევზებს პირდაპირ თავიანთი პირისკენ მიერეკებიან. კიდევ უფრო დიდ ინტრესს ის ფაქტი იწვევს, რომ ზოგჯერ ისინი თავიანთ ფარფლებს იმგვარად ამოძრავებენ, რომ მათი შიდა ზედაპირის თეთრმა კანმა მზის შუქი აირეკლოს და ამან თევზების დეზორიენტაცია გამოიწვიოს.

ჯერ-ჯერობით ასეთი ქცევა მხოლოდ რამდენიმე ვეშაპის მაგალითზეა აღწერილი, თუმცა მეცნიერებს მიაჩნიათ, რომ ეს იშვიათი გამონაკლისი არ არის.

ამ გასაოცარი აღმოჩენის შესახებ მკვლევართა ჯგუფმა გუშინ, ჟურნალში Royal Society Open Science გამოქვეყნებული სტატიით ამცნო მსოფლიოს.