მთავრობის ადმინისტრაცია ეკონომიკის მინისტრის, ნათია თურნავას გადადგომას უარყოფს. როგორც ადმინისტრაციის პრესსამსახურმა On.ge-ს უთხრა, გავრცელებული ინფორმაცია ტყუილია.

ეკონომიკის მინისტრის გადადგომის შესახებ ინფორმაცია დღეს, 14 ოქტომბერს TV პირველმა გაავრცელა.

ტელეკომპანიას მთავრობის საკადრო ცვლილებაზე ინფორმაცია აქამდეც გაუვრცელებია. მიმდინარე წლის აგვისტოში TV პირველი აცხადებდა, რომ შს მინისტრი გიორგი გახარია პრემიერ-მინისტრი გახდებოდა, ხოლო ირაკლი ღარიბაშვილი მთავრობაში ბრუნდებოდა. ორივე ეს პროგნოზი გამართლდა.

ნათია თურნავას მინისტრად დანიშვნიდან რამდენიმე დღეში პანკისში საპოლიციო ძალები შევიდა. ადგილობრივებმა მდინარე ალაზანზე მშენებარე ჰესზე ტექნიკის შესვლა გააპროტესტეს, რასაც იქ მობილიზებულ პოლიციასთან დაპირისპირება მოყვა.

როგორც შინაგან საქმეთა სამინისტროში განმარტეს, დილას სოფელში პოლიცია ეკონომიკის სამინისტროს მიმართვის საფუძველზე შეიყვანეს, სპეცდანიშნულების რაზმები კი დაპირისპირების გამო დაამატეს.

ამასთანავე, მისი მინისტრობის დროს, 2 მაისს ფოთის ღრმაწყლოვანი პორტის მშენებლობის ნებართვა გასცა, რომელიც ნათი თურნავამ მაისის ბოლოს გააუქმა. ამას წინ უძღოდა ანაკლიის კონსორციუმის საგანგებო განცხადება, სადაც აღნიშნული იყო, რომ მთავრობამ მათ ფოთში ახალი ნავსადგურის მშენებლობაზე ნებართვის გაცემა დაუმალა. თურნავას განმარტებით, ეს დოკუმენტი არ წარმოადგენდა სამშენებლო ნებართვას, არამედ ესა იყო ე.წ. მიწათსარგებლობის წინასწარი პირობების დოკუმენტი.