საქართველოს უზენაესი სასამართლოს მოსამართლეობის კანდიდატი, ვლადიმერ კაკაბაძე ფიქრობს, რომ როგორც წინა ხელისუფლების დროს, ახლაც ქვეყანა დემოკრატული საშუალებებით იმართება. ამის შესახებ მან იურიდიულ საკითხთა კომიტეტის სხდომაზე მმართველი პარტიის წევრის, მამუკა მდინარაძის კითხვაზე პასუხის გაცემის დროს ისაუბრა.

მამუკა მდინარაძე: დღეს მმართველობის რა ფორმაა?

ვლადიმერ კაკაბაძე: საპარლამენტო, დემოკრატიული რესპუბლიკა.

მამუკა მდინარაძე: დემოკრატიაა, დემოკრატიული მეთოდებია დღეს?

ვლადიმერ კაკაბაძე: ცალსახად...

მამუკა მდინარაძე: 2012 წლამდე, მაგალითად, 2010 წელს როგორი მეთოდები იყო?

ვლადიმერ კაკაბაძე: იგივე...

მამუკა მდინარაძე: დემოკრატია იყო?

ვლადიმერ კაკაბაძე: კიბატონო...

მამუკა მდინარაძე: თქვენ მიგაჩნიათ, რომ 2012 წლამდე მართვის მეთოდები იყო დემოკრატიული?

ვლადიმერ კაკაბაძე: კიბატონო, კიბატონო...

"მოქმედებდა კონსტიტუცია, პარლამენტი იყო არჩევითი. ის სიღრმეები, როგორც შეიძლება ეს მსჯელობა განავითაროთ, დღევანდელი გასაუბრების ფარგლებს სცდება", — დასძინა უზენაესი სასამართლოს მოსამართლეობის კანდიდატმა.

ვლადიმერ კაკაბაძე მეათეა იმ 20-კაციანი სიიდან, რომელიც იუსტიციის უმაღლესმა საბჭომ პარლამენტს გადაუგზავნა. ახლა კომიტეტებში მათი მოსმენა მიმდინარეობს, რამდენიმე კვირაში კი პარლამენტი მათ კანდიდატურას უყრის კენჭს.