პატრიოტთა ალიანსმა 8 ოქტომბრის საპარლამენტო არჩევნების შემდეგ პირველი ბრიფინგი გამართა, რომელზეც პარტიის ლიდერმა, დავით თარხან-მოურავმა განაცხადა, რომ რეალურად ქართული ოცნების შემდეგ პატრიოტთა ალიანსია მეორე ძალა და არა ნაციონალური მოძრაობა:

"პარლამენტში ჩვენ შევალთ და იმის მოლოდინი, რომ არ შევალთ, არ უნდა იყოს. ჩვენ აქამდე ყველა ბერკეტს ვიყენებდით, ახლაც გამოვიყენებთ და პარლამენტშიც ვიმუშავებთ, უამრავი კითხვის ნიშანია, რომლებზეც პასუხები უნდა მივიღოთ. ჩვენ ვართ მეორე ძალა და არა ნაციონალური მოძრაობა. ჩვენს მხარდამჭერებში ზოგი კონფრონტაციის მომხრეა, ზოგი თვლის, რომ უნდა მივიღოთ ეს შედეგები. ამიტომ 22 ნოემბერს ყრილობა დაინიშნება, სადაც ამ თემებზე ვიმსჯელებთ.

არ ვართ არჩევნებით შედეგებით კმაყოფილები. ამ დღეებში იყო ძალიან ბევრი შეხვედრა და მცდელობა, რომ დაგვისაბუთონ, რომ არჩევნები ჩატარდა სამართლიანად. არის უამრავი კითხვის ნიშანი. გაუგებარია, როგორ შეიძლება მთელ აჭარაში ავიღოთ 8 ათასი თუ 8 500 ხმა, როცა ერთი მიტინგზე ბათუმში 28 ათასი კაცი იყო. ეს შეუძლებელია. ასევე გაუგებარია, არჩევნების დინამიკიდან გამომდინარე, 12-დან 15 საათამდე 15 და 20%-ით მეტი ამომრჩეველი მოვიდეს უბანზე, ვიდრე 10-დან 12-მდე მაშინ, როცა წინა წლებში ასეთი პრაქტიკა არ ყოფილა.

როგორ შეიძლება 280 ათასმა კაცმა დაგიდოს ხელშეკრულება, რომ გაძლევს ხმას და კიდევ ამაზე მეტია, რომელმაც ხელშეკრულება არ დადო და შენი მხარდამჭერია და შენ გეუბნებიან, რომ მხოლოდ 100 ათასმა მოგცა ხმა. ამ კითხვაზე პასუხები არავის აქვს".