პრემიერ-მინისტრის, გიორგი გახარიას განცხადებით, ხვალიდან, 11 ოქტომბრიდან ქართველი სამღვდელოებისთვის დავით გარეჯის კომპლექსში არსებული ყველა მონასტერი გაიხსნება. პრემიერმა აღნიშნა, რომ ამ საკითხზე აზერბაიჯანში ვიზიტისას პრეზიდენტს, ილჰამ ალიევს ესაუბრა.

"ალიევმა ბრძანა, რომ ჩვენ გვაქვს ისტორია და გეოგრაფია, რომელიც გვაკავშირებს და, რა თქმა უნდა, შემიძლია ამას სრულად დავეთანხმო... სწორედ ამ საფუძველზე გვქონდა აბსოლუტურად ღია საუბარი მიმდინარე მოვლენებზე", — აღნიშნა გახარიამ მთავრობის სხდომის დაწყების წინ.

მან კიდევ ერთხელ აღნიშნა, რომ საქართველოსა და აზერბაიჯანს შორის საზღვრის დაუდგენელი მონაკვეთები პოსტსაბჭოთა მემკვიდრეობაა. პრემიერმა, ასევე, განმარტა, რომ ამ საკითხისადმი გამონათქვამებსა და მოქმედებებში ყველას სიფრთხილე მართებს:

"ჩვენ არაერთხელ აღვნიშნეთ, რომ ეს პრობლემა უნდა გადაწყდეს ორი ქვეყნის ნაციონალური ინტერესების, ისტორიული მემკვიდრეობისა და ეკლესიის ინტერესების გათვალისწინებით. ეს არის მიდგომის ყველაზე მნიშვბელოვანი კომპონენტი".

აზერბაიჯანში პრემიერის ვიზიტამდე საქართველოს მართლმადიდებელი ეკლესიის კათოლიკოს-პატრიარქი ილია მეორემ მიმართვა გაავრცელა. პატრიარქი დემარკაციის პროცესის დასრულებამდე სტატუს-კვოს აღდგენას მოითხოვდა, რომ მომლოცველებმა, ტურისტებმა და სასულიერო პირებმა მონასტერში შესვლა შეძლონ.

ილია მეორე წერდა, რომ გაუგებარია აზერბაიჯანული მხარის ქმედებები, რომელთა გამოც მომლოცველებს, ტურისტებსა და სასულიერო პირებს უდაბნოსა და ჩიჩხუტურის მონასტრების ტერიტორიაზე შესვლა აეკრძალათ.

"გამოდის, რომ ამდენი ხნის რეალობა წელს, ყოველგვარი ლოგიკის გარეშე, შეიცვალა, რასაც ჩვენ ვერ შევეგუებით", — აცხადებს პატრიარქი.

საქართველო-აზერბაიჯანის საზღვარზე, დავით გარეჯის მონასტრის მონაკვეთზე გადაადგილების შეზღუდვები რამდენიმე კვირის წინ დაწესდა. როგორც საგარეო საქმეთა მინისტრის მოადგილე ლაშა დარსალიამ განმარტა, შეზღუდვები უსაფრთხოებისა და შემდგომი ინციდენტების თავიდან აცილების მიზნით დაწესდა.

14 ივლისს დავით გარეჯის სასაზღვრო მონაკვეთზე ადგილობრივ მოსახლეობასა და აზერბაიჯანელ მესაზღვრეებს შორის დაპირისპირება მოხდა. დარსალიას განმარტებით, ინციდენტის შემდეგ აზერბაიჯანულმა მხარემ მის მიერ კონტროლირებად ტერიტორიაზე მესაზღვრეების რაოდენობა გაზარდა და ლოჯისტიკური უზრუნველყოფისთვის საჭირო დროებითი ინფრასტრუქტურა განათავსა. პარალელურად, გაიზარდა ქართველი მესაზღვრეების რაოდენობაც.

დავით გარეჯთან დაკავშირებით საქართველო-აზერბაიჯანის საზღვარზე ვითარება ბოლო თვეების განმავლობაში რამდენჯერმე დაიძაბა. აპრილში სამონასტრო კომპლექსთან გზა გადაკეტილი იყო ოთხი დღის განმავლობაში, თუმცა შემდგომში გაიხსნა. საზღვრის დადგენის საკითხზე სპეციალური კომისია მუშაობს, რომელშიც აზერბაიჯანული და ქართული მხარეების წარმომადგენლები შედიან.