სასოწარკვეთილი დიასახლისების მსახიობი რიკარდო ჩავირა ამავე სერიალის მთავარი როლის შემსრულებლის, ფელისიტი ჰოფმანის 2-კვირიან პატიმრობას თეთრკანიანების პრივილეგიას უკავშირებს.

ჩავირა ABC-ის სერიალში კარლოს სოლისის როლს ასრულებდა. ის მიიჩნევს, რომ სასჯელი, რომელიც ლინეტ სკავოს როლის შემსრულებელს დაეკისრა, ხანმოკლეა და ეს ვადა დიდ კავშირშია ბრალდებულის რასასთან.

"თეთრკანიანების პრივილეგია. და მე ამას რვა წლის განმავლობაში ვხედავდი, ასე რომ, ვიცი რაზეც ვლაპარაკობ. ანგარიშვალდებულება და პასუხისმგებლობა ამ ხალხისთვის არაფერს ნიშნავს", — დატვიტა მან ჰოფმანის პატიმრობაზე ლინკთან ერთად.

მის ტვიტს სხვა კომენტარებიც ერთვოდა, რომელშიც მსახიობი სერიალის 8-წლიან გადაღებებს არც ისე პოზიტიურ ნარატივში იხსენებდა და ამბობდა, რომ ამ პერიოდში ყოველდღიურ ცხოვრებაში განიცდიდა თეთრკანიანების პრივილეგიას. ჩავირა ამერიკელია, თუმცა მის მამას მექსიკური წარმომავლობა აქვს.

მსახიობმა 13 სექტემბერს დატვიტა, თუმცა მისი კომენტარი აქამდე შეუმჩნეველი იყო და სულ ცოტა ხნის წინ გავირუსდა, რის შემდეგაც მან მიიპყრო მედიის ყურადღება მიიპყრო.

რიკარდო ჩავირა და ფელისიტი ჰოფმანი სერიალში სასოწარკვეთილი დიასახლისები.

ფოტო: ABC

ჩავირას გმირის ცოლის, გაბრიელა სოლისის როლს ევა ლონგორია ასრულებდა. ის ერთ-ერთი იყო იმ 27 ცნობილ ადამიანს შორის, რომელმაც მოსამართლეს წერილი გაუგზავნა და ჰოფმანისთვის მსუბუქი სასჯელი ითხოვა.

ფელისიტი ჰოფმანის სასჯელის ათვლა ციხეში 25 ოქტომბერს დაიწყება. 14-დღიანი პატიმრობის გარდა, ის ჯარიმის სახით $30 000 დოლარს გადაიხდის და 250 საათის განმავლობაში საზოგადოების საკეთილდღეოდ იმუშავებს.

ჰოფმანმა 2017 წელს $15 000 გადაიხადა იმისთვის, რომ მისი შვილის გამოცდის შედეგები საიდუმლოდ გასწორებულიყო, რათა მას უნივერსიტეტში ჩაებარებინა. საიდუმლო სქემა წლის დასაწყისში გამოაშკარავდა, რომლის მიხედვითაც, მდიდარი ოჯახები შვილების სასწავლებელში მოსახვედრად ფულს იხდიდნენ.

ამავე თემაზე: