ფელისიტი ჰოფმანი, რომელსაც სექტემბრის დასაწყისში 2-კვირიანი პატიმრობა მიესაჯა, წლევანდელი ემიზე უყურადღებოდ არ დაუტოვებიათ.

დაჯილდოების ერთ-ერთმა კომენტატორმა, ტომას ლენონმა რამდენიმე-წამიანი ჩართვისას ჰოფმანი გაიხსენა:

"პროდიუსერებმა მთხოვეს გამოვხმაურებოდი ქალის მთავარი როლის საუკეთესო შემსრულებელს, რომელიც ამ ღამით ციხიდან გვიყურებს. იმედი გვაქვს ეს ორი კვირა წარმატებით ჩაივლის. თავი არ დახარო!"

ფელისიტი ჰოფმანმა ემი 2005 წელს მიიღო კომედიური სერიალის საუკეთესო მსახიობი ქალის ნომინაციაში, სასოწარკვეთილ დიასახლისებში განსახიერებული ლინეტ სკავოს როლისთვის.

ჰოფმანმა 2017 წელს $15 000 გადაიხადა იმისთვის, რომ მისი შვილის გამოცდის შედეგები საიდუმლოდ გასწორებულიყო, რათა მას უნივერსიტეტში ჩაებარებინა. საიდუმლო სქემა წლის დასაწყისში გამოაშკარავდა, რომლის მიხედვითაც, მდიდარი ოჯახები შვილების სასწავლებელში მოსახვედრად ფულს იხდიდნენ. ჰოფმანს კოლეჯის სკანდალის საქმეში მონაწილეობისთვის 14-დღიანი პატიმრობა მიესაჯა. მას ასევე მოუწევს ჯარიმის სახით $30 000 დოლარის გადახდა და 250 საათის განმავლობაში საზოგადოების საკეთილდღეოდ მუშაობა.

კომენტატორის შენიშვნით ყველა კმაყოფილი არ დარჩენილა. მომხმარებლების ნაწილმა ტვიტერზე მის ხუმრობას "უგემოვნო" უწოდა.

ასევე იხილეთ: