პოპულარული ამერიკული სერიალის, სასოწარკვეთილი დიასახლისების მსახიობს, ფელისიტი ჰოფმანს კოლეჯის სკანდალის საქმეში მონაწილეობისთვის 14-დღიანი პატიმრობა მიესაჯა. მას ასევე მოუწევს ჯარიმის სახით $30 000 დოლარის გადახდა და 250 საათის განმავლობაში საზოგადოების საკეთილდღეოდ მუშაობა.

ჰოფმანმა 2017 წელს $15 000 გადაიხადა იმისთვის, რომ მისი შვილის გამოცდის შედეგები საიდუმლოდ გასწორებულიყო, რათა მას უნივერსიტეტში ჩაებარებინა. საიდუმლო სქემა წლის დასაწყისში გამოაშკარავდა, რომლის მიხედვითაც, მდიდარი ოჯახები შვილების სასწავლებელში მოსახვედრად ფულს იხდიდნენ. დანაშაულში სულ 50-მდე მონაწილე პირი იკვეთება, თუმცა მათ შორის არ არიან მათი შვილები.

"ჩემს საქციელს გამართლება არ აქვს. მინდა ბოდიში მოვუხადო ჩემს ქალიშვილს, ჩემს ქმარს, ჩემს ოჯახს და საგანმანათლებლო საზოგადოებას. განსაკუთრებული ბოდიში კი მინდა მოვუხადო სტუდენტებს, რომლებიც ბევრს შრომობენ სასწავლებლებში მოსახვედრად და მათ მშობლებს, რომლებიც ყველაფერს აკეთებენ შვილების ხელშესაწყობად", — განაცხადა ჰოფმანმა განაჩენის გაგების შემდეგ.

პროკურატურა ჰოფმანის წინააღმდეგ 6-კვირიან პატიმრობასა და $20 ათასის ოდენობის ჯარიმას ითხოვდა. მოსამართლის განცხადებით, მას სჯერა, რომ ჰოფმანი საკუთარი დანაშაულის მიმართ პასუხისმგებლობას იაზრებს, თუმცა დასძენს, "კარგი დედობა მისი საქციელის გამართლება არაა".

ჰოფმანი პირველია, რომელსაც ამ საქმეზე განაჩენი გამოუტანეს. მსახიობმა წარსულში განაცხადა, რომ მისი ქმედებების შესახებ მისმა შვილმა არაფერი იცოდა და ამ ამბის გაგებამ ის ემოციურად გაანადგურა.

"ჩემი შვილი მიყურებდა, სახეზე ცრემლები ჩამოსდიოდა და მეკითხებოდა: "რატომ არ გჯეროდა ჩემი? რატომ ფიქრობდი, რომ ამას დამოუკიდებლად ვერ შევძლებდი?" მის კითხვებზე ადეკვატური პასუხი არ მქონია. მხოლოდ ბოდიშის მოხდა შემეძლო. შეშინებული და სულელი ვიყავი და უადგილო ნერვიულობის დროს გავაკეთე ის, რისი არიდებაც ყველაზე მეტად მინდოდა. მე ჩემი შვილის მომავალი დავთმე და მას სახელი გავუტეხე", — დაწერა ჰოფმანმა მოსამართლისთვის განკუთვნილ წერილში.

კოლეჯების სკანდალის საქმეში ერთ-ერთი ბრალდებულია ამერიკელი მსახიობი და მილიონერი ლორი ლოულინი, რომელმაც შვილების უნივერსიტეტებში მოსახვედრად ნახევარი მილიონი დოლარი გადაიხადა. თუმცა ლოულინი ბრალდებას უარყოფს. მისი სასამართლო 2 ოქტომბერსაა ჩანიშნული. ბრალდებულებს შორისაა ამერიკელი მწერალი ჯეინ ბუკინგემი, რომელმაც თავისი შვილის უნივერსიტეტში ჩაბარებისთვის 50 ათასი დოლარი გადაიხადა და იგივეს გეგმავდა თავისი უმცროსი შვილისთვის და ცნობილი ინსტაგრამ-მოდელისთვის, ლილია ბუკინგემისთვის. ჯეინ ბუკინგემი ასვე ატარებდა ლექციებს, სახელწოდებით თავდაჯერებულ მშობლებს თავდაჯერებული შვილები ჰყავთ.