ამერიკის ელჩი საქართველოში იან კელი აცხადებს, რომ საქართველოში საპარლამენტო არჩევნები კონკურენტუნარიან და კარგად ორგანიზებულ გარემოში გაიმართა, ხოლო რაც შეეხება ძალადობის შემცველ ინციდენტებს, მთავრობამ ხელი უნდა შეუწყოს მის დროულ და ეფექტიან გამოძიებას.

"ამერიკის შეერთებული შტატების საელჩო ეთანხმება იმ შეფასებებს, რომელიც ჰქონდათ საერთაშორისო დამკვირვებლებს არჩევნების შესახებ. საპარლამენტო არჩევნები ჩატარდა კონკურენტულ და კარგად ორგანიზებულ გარემოში, სადაც ფუნდამენტური ღირებულებები დაცული იყო.

უბნების დიდ უმრავლესობაზე მოსახლეობას ჰქონდა საშუალება თავისი არჩევანი თავისუფლად დაეფიქსირებინა, თუმცა სამწუხაროდ იყო რამდენიმე უბანი, სადაც ადგილი ჰქონდა დაშინების მცდელობას და ძალადობას, მათ შორის მარნეულში. ჩვენ მკაცრად ვგმობთ აღნიშნულ ფაქტებს.

ასევე მოვუწოდებთ მთავრობას, გამოიძიოს ყველა ინციდენტი და მათი მიზეზი, რაც არჩევნების დღეს დაფიქსირდა.

აღსანიშნავია, რომ ეს იყო არჩევნების პირველი ეტაპი და მოვუწოდებთ ყველა პარტიას თავისუფლად გამოხატოს დამოკიდებულება და შენიშვნები, რაც აქვთ, და დააფიქსირონ თავისი აზრი იმ ინციდენტებზე, რაც მოხდა.

საქართველოს კანონმდებლობის შესაბამისად, ჩვენ გავაგრძელებთ არჩევნების მეორე ტურის მონიტორინგსაც".

აღნიშნული განცხადება იან კელიმ საზოგადოებრივი მაუწყებლის, აშშ-ის საელჩოს და რეგიონულ მაუწყებელთა ასოციაციის (GARB) ერთობლივი პრესკონფერენციაზე გააკეთა.