საქართველოს უზენაესი მოსამართლეობის კანდიდატი, მაია ვაჩაძე ამბობს, რომ ქართლი ოცნება ხელისუფლებაში უმრავლესობით ყოფნის გამო იმავე საფრთხის წინაშეა, რაც ნაციონალურ მოძრაობას ჰქონდა. ამის შესახებ კანდიდატმა ქართული ოცნების წევრთან, მამუკა მდინარაძესთან წინა ხელისუფლების გადაცდომების შეფასებებზე საუბრისას განაცხადა.

"თუ ჩვენ შევთანხმდებით, დემოკრატიულ მმართველობაში არის ძალიან ბევრი ხარვეზი და ამ გამოწვევების წინაშე დგახართ თქვენც, ახალი ხელისუფლებაც იმიტომ, რომ თქვენც უმრავლესობაში ხართ. მათაც [ნაციონალურ მოძრობას] უმრავლესობა ჰქონდათ. როცა დემოკრატია არის უმრავლესობის ხელში, ხარვეზები და შეცდომები გარდაუვალია", — განმარტა ვაჩაძემ.

მას მდინარაძისთვის სამართლებრივად იმის ახსნაც მოუწია, რატომ ვერ შეფასდება წინა ხელისუფლების მმართველობა ავტოკრატიულ ან ტოტალიტარულ მმართველობად.

"ჩვენ გვაქვს საერთაშორისო დოკუმენტები ავტოკრატიისა და ტოტალიტარიზმის შეფასების. ჩვენ ხო არ ვიქნებით ის სახელმწიფო, რომელიც ამ საერთაშორისო დოკუმენტებს არ გავითვალისწინებთ. ჩვენ იმ საერთაშორისო დოკუმენტებიდან გამომდინარე არ შეგვიძლია ვთქვათ, რომ ტოტალიტარიზმი იყო. ხო გასაგებია?" — უთხრა მოსამართლეობის კანდიდატმა დეპუტატს.

მაია ვაჩაძე მეექვსეა იმ 20 მოსამართლეს შორის, რომელიც იუსტიციის უმაღლესმა საბჭომ საქართველოს პარლამენტს დასამტკიცებლად გაუგზავნა.

მაია ვაჩაძის შესახებ

მაია ვაჩაძე 1999 წლიდან დღემდე უზენაესი სასამართლოს მოსამართლეა. მანამდე, 1998-1999 წლებში იყო თბილისის საოლქო სასამართლოს მოსამართლე.

მაია ვაჩაძე უზენაესი სასამართლოს დიდი პალატის იმ 9-კაციან შემადგენლობაში იყო, რომელმაც რუსთავი 2-ის საქმე განიხილა და შედეგად, ტელეკომპანია ბიზნესმენ ქიბარ ხალვაშს მიაკუთვნეს. ამით უზენაესმა სასამართლომ წინა ორი ინსტანციის გადაწყვეტილება ძალაში დატოვა.

მაია ვაჩაძემ განიხილა უზენაეს სასამართლში ტრანსგენდერი პირის პირადობის დოკუმენტებში სქესის შესახებ ჩანაწერის ცვლილების საქმე. სარჩელი პირველმა ორმა ინსტანციამ არ დააკმაყოფილა. უზენაეს სასამართლოს უნდა ემსჯელა, თუ რამდენად სწორია, როცა სქესის შეცვლა განიმარტება, როგორც ქირურგიული ოპერაცია. უზენაესმა სასამართლომ დაუშვებლად ცნო საჩივარი.