ჩრდილოეთ კორეის განცხადებით, სტოკჰოლმში ბირთვულ განიარაღებაზე მოლაპარაკებები აშშ-სთან ჩაიშალა. მათ მოლაპარაკებები მის ოფიციალურ დასრულებამდე დატოვეს.

"მოლაპარაკებებმა ჩვენი მოლოდინები არ გაამართლა", — განაცხადა დელეგაციის ხელმძღვანელმა. მისივე თქმით, აშშ მათთან "ცარიელი ხელებით" მივიდა.

აშშ-ს სახელმწიფო დეპარტამენტის წარმომადგენლი, მორგან ორტაგუსი ამბობს, რომ ჩრდილოეთ კორეის განცხადება მოლაპარაკებების შინაარსსა და სულისკვეთებას არ ასახავს. მისივე თქმით, ამერიკულმა მხარემ ახალი ინიციატივები წარადგინა და აღნიშნა, რომ ისინი 70-წლიან ომსა და დაპირისპირებას ერთ დღეში ვერ აღმოფხვრიან.

აშშ-მ და ჩრდილოეთ კორეამ ბირთვულ განიარაღებაზე მოლაპარაკებები შაბათს, 5 ოქტომბერს განაახლეს.

დონალდ ტრამპმა და კიმ ჩენ ინმა მოლაპარაკებების განახლებაზე გადაწყვეტილება ივნისში მას შემდეგ მიიღეს, რაც თებერვალში ვიეტნამში ლიდერების სამიტი ჩაიშალა. მაშინ მიზეზი ჩრდილოეთ კორეისთვის სანქციების მოხსნას ეხებოდა.