დღეს, 5 ოქტომბერს ტელეკომპანია ფორმულას მთავარი საინფორმაციო გამოშვება 20 საათზე პირველად გავიდა. ფორმულა ნიუსის წამყვანი ელისო ჯარიაშვილია.

საინფორმაციო გამოშვებამდე რამდენიმე დღით ადრე ფორმულას საინფორმაციო სამსახურის უფროსი გიორგი ლაფერაშვილი და არხის დირექტორი ზუკა გუმბარიძე რუსთავი 2-ის საქმეზე გამოსაკითხად პროკურატურაში დაიბარეს.

"პროკურატურას დაჭირდა ტელეკომპანია ფორმულას დირექტორისა და საინფორმაციო სამსახურის უფროსის გამოკითხვა მაშინ, როცა ფორმულა გავიდა ეთერში. ბუნებრივია, ჩვენ არ ვეძებთ ბნელ ოთახში შავ კატას, მხოლოდ იმ შემთხვევაში, როცა კატა იქ არის, ვამბობთ, რომ არის. დამიჯერეთ ის ოთახი შავი კატებითაა სავსე", — თქვა გიორგი ლაფერაშვილმა პროკურატურიდან გამოსვლის შემდეგ.

პირველი ოქტომბრიდან ფორმულას მაუწყებლობა სერიალებითა და ფილმებით დაიწყო. 7 ოქტომბრიდან კი არხზე უკვე დილის გადაცემაც ჩაეშვება.

ფორმულამ მაუწყებლობის უფლება 29 აგვისტოს მიიღო. ამ არხის ფორმულა გახსნის შესახებ ინფორმაცია რამდენიმე თვის წინ გახდა ცნობილი. არხის საკონტროლო პაკეტი, 51 პროცენტი თავდაცვის ყოფილ მინისტრს, დავით კეზერაშვილს ეკუთვნის.

ფორმულა კრეატივი ცნობილია მისი მთავარი პოპულარული პროდუქტით, ყველაზე წარმატებული ქართული სერიალით "ჩემი ცოლის დაქალები", რომელსაც კომპანია რუსთავი 2-ის დაკვეთით იღებდა. ის, ასევე, ინტერნეტგამოცემა On.ge-ს მეწილეცაა. გარდა ამისა, კრეატივის გუნდს ეკუთვნის ფილმები "რაც ყველაზე ძალიან გიყვარს", "ტაქსი", "ჭამა და სექსი", ასევე, მრავალი კომპანიის სარეკლამო რგოლი და ხმაურიანი კამპანია.