ერთიანი ნაციონალური მოძრაობის პარტიული სიის მესამე ნომერი, ელენე ხოშტარია ფეისბუკის პირად გვერდზე წერს, რომ მისი პარტია აუცილებლად უნდა შევიდეს პარლამენტში:

"ჩემი პრინციპული პოზიციაა, რომ პარლამენტში უნდა შევიდეთ და ბოიკოტი არის დღეს მთავარი პროგრესული პარტიის სუიციდი, შესაბამისად ქვეყნისთვის უკიდურესად საზიანო.

ხვალ საღამოს გაგაცნობთ პარტიის პოზიციას პოლიტსაბჭოს სხდომის შემდეგ".

საქართველოს ყოფილმა პრეზიდენტმა, ოდესის ოლქის გუბერნატორმა, მიხეილ სააკაშვილმა დღეს განაცხადა, რომ პარტიამ პარლამენტში შესვლა-არშესვლის საკითხი მხოლოდ და მხოლოდ აქტივისტების აზრის გათვალისწინებით უნდა მიიღოს. გარდა ამისა, ის ვერ ხედავს აზრს, რომ ენმ-ს კანდიდატებმა არჩევნების მეორე ტურში გააგრძელონ ბრძოლა.

ენმ-ს რიგებში, არჩევნების წინასწარი შედეგების გამოცხადების შემდეგ, გარკვეული აზრთა სხვადასხვაობაა. პარტიის წევრთა ნაწილი მომხრეა პარლამენტში შესვლის, ნაწილი კი ბოიკოტს ემხრობა.

10 ოქტომბრის 17 საათის მონაცემებით, ერთიანმა ნაციონალურმა მოძრაობამ მიიღო ხმების 27,11%, ქართულმა ოცნებამ - 48,65%, პატრიოტთა ალიანსი - 5%.