Reuters-ის ინფორმაციით, ირანის მთავრობასთან დაკავშირებულმა ჰაკერების ჯგუფმა აშშ-ს პრეზიდენტის, დონალდ ტრამპის საარჩევნო კამპანიაზე თავდასხმა სცადეს, თუმცა უშედეგოდ.

კორპორაცია მაიკროსოფტმა განაცხადა, რომ ეს იყო "აშკარა" კიბერ აქტივობა იმ ჯგუფის მიერ, რომელთა სამიზნე გამხდარა ამერიკის ამჟამინდელი და ყოფილი მთავრობა, ჟურნალისტები, რომლებიც გლობალურ პოლიტიკას აშუქებენ და ცნობილი ირანელები, რომლებიც ირანს გარეთ ცხოვრობენ.

განცხადებაში მაიკროსოფტი უარყოფს, რომ ჰაკერების სამიზნე აშშ-ს მოქმედი მთავრობა იყო, თუმცა, როიტერსი წერს, რომ მათი წყაროს ცნობით, სამიზნე ტრამპის ხელახალი არჩევის კამპანია იყო.

ფედერალური ბიურო კომენტარს არ ავრცელებს, ხოლო საარჩევნო საკითხებში უსაფრთხოების სამსახურის დირექტორი, კრის კერბსი ამბობს, რომ ის იცნობს მაიკროსოფტის განცხადებას და მომხდარს უწოდებს "დემოკრატიული ინსტიტუტების განდაგურების კიდევ ერთ მცდელობას".

ამერიკის შეერთებულ შტატებსა და ირანს შორის დაძაბულობამ 2018 წლის მაისიდან იმატა, მას შემდეგ, რაც აშშ გამოვიდა ირანის ბირთვული შეთანხმებიდან.

ირანის ბირთვული შეთანხმება

ტრამპს არაერთხელ უთქვამს, რომ შეთანხმება "უსამართლო" იყო და მხოლოდ ირანის სასარგებლოდ მოქმედებდა. პრეზიდენტმა შეთანხმებას "ხრწნადი და დამპალი სტრუქტურა" უწოდა. მისი თქმით, ამ შეთანხმებას არ აქვს რეალური ძალა იმისთვის, რომ ირანში ბირთვული იარაღის შეტანას შეუშალოს ხელი. მისივე თქმით, შეთანხმების დატოვება ამერიკას უფრო უსაფრთხოს გახდის.