აუდიტის ანგარიშის მიხედვით, საქართველოს სახელმწიფო ელექტროსისტემა 3 წლის განმავლობაში უნებართვო მშენებლობის გამო 25-ჯერ დააჯარიმეს. ამის შესახებ აუდიტის შესაბამისობის ანგარიშშია აღნიშნული, რომელიც სახელმწიფო კომპანიის 2014-2017 წლების საქმიანობას ეხება.

ანგარიშის მიხედვით, სსე ჯამში 69 400 ლარით დაჯარიმდა, საიდანაც 40 100 ლარი განმეორებითი სამართალდარღვევისთვის დაკისრებული ჯარიმაა.

"აღნიშნული ცხადყოფს, რომ სამშენებლო სამუშაოების წარმოებისას კანონმდებლობით გათვალისწინებული დაჯარიმების საფუძვლების აღმოფხვრა ელექტროსისტემისთვის არ არის იმდენად პრიორიტეტული, რამდენადაც უნდა იყოს ასეთ სამუშაოებთან დაკავშირებული მნიშვნელოვანი რისკების გამო", — წერია ანგარიშში.

ამავე ანგარიშის მიხედვით, ელექტროსისტემის მიერ 2014-2015 წლებში ჯვარი-ხორგისა და ქსანი-სტეფანწმინდის გადამცემი ხაზების პროექტირებისა და მშენებლობის მიზნით გაფორმებული ხელშეკრულებების მიხედვით, გადამცემი ხაზების მშენებლობა უნდა დასრულებულიყო 2016 და 2017 წლებში. თუმცა, აუდიტის ცნობით, პროექტის განხორციელების დროს პრობლემა წარმოიქმნა, რამაც ხაზების მშენებლობა შეაფერხა.

აუდიტის ინფორმაციით, კონტრაქტორების მოცდენის გამო ელექტროსისტემამ 10 220 729 ლარის ჯარიმა გადაიხადა. ამ ჯარიმის გადახდის მთავარი მიზეზი კი ის იყო, რომ კომპანია ხელშეკრულებების გაფორმების დროს არ შეაფასა არსებული რისკები.