ნათია მეზვრიშვილი მთავრობის ადმინისტრაციის ხელმძღვანელი იქნება. ის ამ თანამდებობაზე კახა კახიშვილს შეცვლის. როგორც მთავრობის განცხადებაში აღნიშნული, კახიშვილი პრემიერ-მინისტრ გიორგი გახარიას მრჩევლად დაინიშნა.

ნათია მეზვირშვილი შინაგან საქმეთა სამინისტროში გიორგი გახარიას მოადგილე იყო. გახარიას დაწინაურების შემდეგ მეზვრიშვილი პრემიერ-მინისტრის აპარატის უფროსი გახდა.

ნათია მეზვრიშვილმა შს მინისტრის მოადგილისა და საპარლამენტო მდივნის თანამდებობა 2017 წელს დაიკავა. 2007-2009 წლებში ნათია მეზვრიშვილი ძველი თბილისის რაიონული პროკურატურის პროკურორი იყო. 2009-2013 წლებში კი საქართველოს მთავარ პროკურატურაში სხვადასხვა თანამდებობაზე მუშაობდა, კერძოდ: საპროკურორო საქმიანობაზე ზედამხედველობის დეპარტამენტის პროკურორი, ფინანსთა სამინისტროში გამოძიების საპროცესო ხელმძღვანელობის დეპარტამენტის პროკურორი, შს სამინისტროს რეგიონულ ტერიტორიულ ორგანოებში საპროკურორო საქმიანობაზე ზედამხედველობის სამმართველოს უფროსი, სტრატეგიული განვითარების სამმართველოს უფროსი, იურიდიული სამმართველოს უფროსი. 2013 წლის დეკემბრიდან იგი საპროკურორო საქმიანობაზე ზედამხედველობისა და სტრატეგიული განვითარების დეპარტამენტის უფროსის თანამდებობას იკავებდა.