პრემიერ-მინისტრი გიორგი გახარია ქართული ოცნების ხელისუფლებაში მოსვლის შვიდი წლისთავს ამომრჩეველს ულოცავს. მან მმართველი გუნდის წინგადადგმულ ნაბიჯად პროპორციულ საარჩევნო სისტემაზე გადასვლა დაასახელა, რაც მის წინააღმდეგ გამართული #სირცხვილიას აქციის ერთ-ერთი მოთხოვნა იყო. გახარიამ აღნიშნა, რომ "ასეთი გამარჯვებები ყველას ერთად ჩვენ კიდევ ბევრი გვექნება":

"დღეს პირველი ოქტომბერია, 2012 წელს ქართველმა ხალხმა, პარტიის ლიდერმა ბიძინა ივანიშვილმა მშვიდობიანად გადადგა კიდევ ერთი წარმატებული ნაბიჯი ქვეყნის დემოკრატიზაციისთვის, რომლის შედეგებსაც დღეს ჩვენ ვხედავთ და რომლის შედეგებისა და მიღწევების გამოხატვა არის ის, რომ ასე ღიად ვსაუბრობთ ექსპერტებთან, ჟურნალისტებთან და ამას ვთვლით, რომ ეს არის ჩვენი ვალდებულება. მე მინდა მივულოცო პირველ რიგში თითოეულ იმ ადამიანს, რომელიც გულწრფელად იღებდა მაშინ მონაწილეობას იმ სამოქალაქო აქტივობებში და ვთვლი, რომ კიდევ ერთი წინგადადგმული ნაბიჯი ქართული დემოკრატიის განვითარებისთვის იყო ის, რაც სულ ახლახანს მოხდა, პროპორციული საარჩევნო სისტემა და ასეთი გამარჯვებები ყველას ერთად ჩვენ კიდევ ბევრი გვექნება".

2012 წლის პირველი ოქტომბრის არჩევნები იყო პირველი დამოუკიდებელი საქართველოს ისტორიაში, რომელშიც მმართველი პარტია, ერთიანი ნაციონალური მოძრაობა დამარცხდა.