სატელევიზიო შოუების მოყვარულებისთვის შემოდგომის დადგომა მარტო იმიტომაცაა მნიშვნელოვანი, რომ წლის მიწურულს უახლესი პროდუქტების პრემიერებისა თუ უკვე აღიარებული სერიალების ახალი სეზონების შესაშური რაოდენობა გროვდება. თანაც, Netflix-სა და HBO-ს მსგავს გიგანტებს უკვე Amazon, Disney+ და Apple TV+ შეურთდა, რის გამოც მაყურებელს უკვე აურაცხელი რაოდენობის სატელევიზიო შოუდან უწევს მისთვის შესაფერისი სერიალის შერჩევა. მაგალითად, უკვე გამოვიდა American Horror Story-ის მეცხრე სეზონი და ამავდროულად, ამ საკულტო სერიალის შემოქმედმა, რაიან მერფიმ კიდევ ერთი ახალი საინტერესო შოუ შექმნა - The Politician, რომლის ნახვაც უკვე შეგიძლიათ Netflix-ზე.

სწორედ ამ ყველაფრის გათვალისწინებით, ეს სტატია დაგეხმარებათ თვალი მიადევნოთ და არ გამოგრჩეთ ყველა ის მნიშვნელოვანი პროექტი, რომელიც მზის სინათლეს უახლოეს მომავალში იხილავს და მათგან თქვენთვის საინტერესო სერიალიც წინასწარ შეარჩიოთ.

Big Mouth - პრემიერა 4 ოქტომბერს

Rick and Morty-სა და BoJack Horseman-ის გვერდით Big Mouth ერთ-ერთი ყველაზე საინტერესო ანიმაციური სერიალია, რომელიც უჩვეულო იუმორის საშუალებით თინეიჯერების ცხოვრების წვრილმანების შესახებ მოგვითხრობს და ამავდროულად სექსუალური განათლების მნიშვნელოვან ინფორმაციასაც აწვდის შესაბამისი ასაკის მაყურებელს. სწორედ ამ სერიალის მესამე სეზონს ვიხილავთ მალე Netflix-ზე.

Mr. Robot - პრემიერა 6 ოქტომბერს

ორ წლიანი შუალედის შემდეგ ტელეეკრანებს უბრუნდება ბევრისათვის საყვარელი სერიალი, რომლის მთავარი როლის შემსრულებელმა, რემი მალეკმა ამასობაში ოსკარის მოპოვებაც მოახერხა. მეოთხე სეზონში ცამეტი სერია იქნება და ალბათ, კვლავ სერიალისთვის დამახასიათებელი გამორჩეული დრამატულობითა და სოციალური სატირით იქნება სავსე.

Batwoman - პრემიერა 10 ოქტომბერს

კომიქსების მოყვარულებისთვის CW-ის ეს ახალი პროექტი უდაოდ საინტერესო იქნება: გოთემში კვლავ აღზევდნენ ბნელი ძალები, მაგრამ მათ ამჯერად ბრიუს უეინის ნაცვლად კეიტ კეინი უპირისპირდება, ვის როლსაც საოცარი რუბი როუზი ასრულებს. ბეტვუმენი პირველი ღიად ლესბოსელი სუპერგმირი იქნება, რომლის შესახებაც დამოუკიდებელი სატელევიზიო შოუ გადაიღეს.

Modern Love - პრემიერა 18 ოქტომბერს

ბოლო პერიოდში კინოდან სულ უფრო მეტმა ვარსკვლავ გადაინაცვლა სატელევიზიო სივრცეში, მათ შორის ერთ-ერთი ოსკაროსანი ენ ჰეთეუეია, რომელიც Amazon-ის უახლეს პროექტში იღებს მონაწილეობას. Modern Love კომედიური ჟანრის რომანტიკული სატელევიზიო შოუა, რომლის პერსონაჟებიც ურთიერთობების, ადამიანური კავშირებისა და სიყვარულის ძიებაში არიან: იქნება ეს ოჯახური, სექსუალური თუ პლატონური სიყვარული.

Watchmen - პრემიერა 20 ოქტომბერს

შესაძლოა, კომიქსების სამყარო არ გიყვარდეთ, მაგრამ ალან მურისა და დეივ გიბონსის საკულტო ნაწარმოების, Watchmen-ის მიხედვით 2009 წელს გადაღებული ფილმი სრულიად განსხვავებული გემოვნების მაყურებლებმაც კი აღიარეს შედევრად. ამჯერად HBO-მ გადაწყვიტა ეს საკულტო ისტორია სერიალად გადააქციოს და თუ ამ კომპანიის მიერ მანამდე შექმნილი სხვა პროექტების ხარისხს გავითვალისიწინებთ, მაშინ მოუთმენლად უნდა დავიწყოთ უკანასკნელი დღეების ათვლა სერიალის პრემიერამდე.

The Morning Show - პრემიერა პირველ ნოემბერს

Apple-მა თავისი ახალი სტრიმინგ სერვისის Apple TV+ გაშვება თავიდანვე საკმაოდ შთამბეჭდავი პროექტებით დაიწყო, მათ შორის ერთ-ერთია The Morning Show, რომელშიც ისეთი ორი ყველასათვის საყვარელი მსახიობი იღებს მონაწილეობა, როგორებიც რიზ უიზერსპუნი და ჯენიფერ ენისტონი არიან. სერიალი დილის გადაცემის წამყვანების ყოველდღიურ ცხოვრებაზე მოგვითხრობს, რომელიც CNN-ის ჟურნალისტის, ბრაიან შელტერის გახმაურებული წიგნის Top of the Morning-ის შთაგონებით შეიქმნა.

His Dark Materials - პრემიერა 4 ნოემბერს

ფილიპ პულმანი თანამედროვეობის ერთ-ერთ ყველაზე გამორჩეული ავტორია, რომელმაც ფენტეზის ჟანრს ოქროს კომპასის სახელით ცნობილი ჯადოსნური ტრილოგია აჩუქა. მისი ამ ნაწარმოების მიხედვით 2007 წელს ნიკოლ კიდმანის მონაწილეობით ფილმიც გადაიღეს, თუმცა, მან ვერ შეინარჩუნა ის ხიბლი, რაც პულმანის მიერ შექმნილ ჯადოსნურ სამყაროს გამოარჩევდა. სამაგიეროდ, იმედისმომცემად გამოიყურება HBO-ს კიდევ ერთი ახალი პროექტი, რომელიც, სავარაუდოდ, არა მხოლოდ ტრილოგიის პირველი წიგნის ისტორიას დაეყრდნობა, არამედ ასევე ძალიან საინტერესო და დაძაბული შემდეგი ორი ნაწილის სატელევიზიო ეკრანიზაციასაც ვიხილავთ.

The Mandalorian - პრემიერა 12 ნოემბერს

Star Wars-ის გულშემატკივრებისთვის Disney+-ს განსაკუთრებული სიახლე აქვს: 12 ნოემბერს სერიალ The Mandalorian-ს პრემიერა შედგება, რომელშიც მოქმედება ფილმ Return of the Jedi-ის სიუჟეტიდან ხუთი წლის შემდეგ ვითარდება და Star Wars-ის ეპოქალურ სამყაროში ეკრანებიდან მოგზაურობა მაყურებელს ამჯერად რვა მსუყე სერიის საშუალებით შეეძლება.

The Crown - პრემიერა 17 ნოემბერს

2016 წელს გამოსულმა ამ სერიალმა თავიდანვე უამრავი მაყურებელი დააინტერესა: ბრიტანეთის სამეფო ოჯახის ისტორია დღემდე მილიონობით ადამიანის ყურადღებას იქცევს. თანაც Netflix-მა ბიუჯეტი არ დაინანა და ისტორიული ფაქტების გასაცოცხლებლად მთელი ეპოქა წვრილმანებამდე აღადგინა. დედოფალ ელიზაბეტ მეორის ირგვლივ განვითარებული მოვლენების შესახებ გადაღებული მესამე სეზონის პრემიერა ნოემბერში შედგება, სადაც ამჯერად მთავარ როლს ოსკაროსანი ოლივია კოლმანი შეასრულებს.

The Witcher - პრემიერა, სავარაუდოდ, ნოემბერში შედგება

Netflix-მა ამ ახალ პროექტზე მუშაობის დაანონსებისას საყოველთაო დაინტერესება კიდევ ერთხელ გამოიწვია: The Witcher პოლონელი მწერლის, ანდრეი საპკოვსკის ჟანრული ლიტერატურის გამორჩეული ნაწარმოებია და მისი მიხედვით ცნობილი თამაშიცაა შექმნილი, რომელიც გეიმერებში დიდი პოპულარობით სარგებლობს. შესაბამისად, სულაც არაა გასაკვირი, რომ ამ ისტორიის მიხედვით გადაღებულმა სერიალმა ჯერ კიდევ გამოსვლამდე მიიქცია დიდი ყურადღება. სერიალში მთავარ როლს ჰენრი კავილი ასრულებს: სუპერმენის შემდეგ ის მონადირე გერალტის სახით მოგვევლინება.