ქართული ოცნების დეპუტატები, დავით მათიკაშვილი და რატი იონათამიშვილი პარლამენტში მომხდარი დაპირისპირების გამო ეკა ბესელიას მოუწოდებენ, დეპუტატის მანდატი დატოვოს.

იონათამიშვილი ამბობს, რომ ბესელიას მხრიდან ეს იყო უღირსი და სამარცხვინო საქციელი და ამით მან "საკუთარი სახე წარმოაჩინა".

"რაც შეეხება ზარდიაშვილს, ჩვენ ვიცით, ამდენი ხნის განმავლობაში ის როგორი წნეხის ქვეშ იყო, მის მიმართ რამდენი შეურაცხმყოფელი განცხადება გაკეთდა, მისი ოჯახის მიმართ, ვანომ მოგვცა ამ მხრივ მოთმინების მაგალითი, ის არასდროს ყვებოდა პროვოკაციას და დღესაც არ აჰყვა", — ამბობს დეპუტატი.

მისივე თქმით, "ადამიანი, რომელსაც შეუძლია, რომ ასე დაეცეს და ამდენის უფლება მისცეს თავს, ის ნამდვილად იმსახურებს, რომ ქართული პოლიტიკის წარსულში იყოს".

"დღევანდელი დღე ნამდვილად იყო ხულიგნობა. როცა პოლიტიკოსი ასე იქცევა, ასეთ დროს ერთადერთი გზა მას პირადი რეაბილიტაციისთვის რაც რჩება, არის ის, რომ საერთოდ უნდა დატოვოს პარლამენტის მანდატი", — თქვა იონათამიშვილმა.

დავით მათიკაშვილი კი ამბობს, რომ ბესელიამ დღეს პროვოკაცია მოაწყო.

"ის ძალიან დიდი ხანია ჩამოცილებულია აქტიურ პოლიტიკურ ველს. ეკა ბესელია აღარ აინტერესებს საზოგადოებას და ის ყველანაირად ცდილობს, დაბრუნდეს აქტუალობაში. ასეთი ქცევის შემდგომ მე მგონია, რომ ეკა ბესელია დეპუტატობას არ იმსახურებს. მან თვითონ უნდა მიიღოს გადაწყვეტილება, ის არის კი ღირსი იყოს კოლეგებთან ერთად ასეთი უღირსი ქცევის შემდეგ, მე მის ადგილას დავტოვებდი მანდატს", — აღნიშნა მათიკაშვილმა.

დღეს, 26 სექტემბრის სხდომაზე ვანო ზარდიაშვილმა მოსამართლე მირანდა ერემაძის მოსმენის დროს ახსენა სიტყვები "ბესელიას მორალი", რის გამოც ბესელია მას ხელით შეეხო.