მართალია, ახალი სასწავლო წლის პირველმა კვირამ უკვე ჩაიარა, თუმცა, ჯერ კიდევ არ არის გვიანი, რომ იმ ქართველ ან უცხოელი მასწავლებლებლებზე მოგიყვეთ, რომლებმაც საკუთარი კრეატიულობით ირგვლივ ყველა აალაპარაკეს.

პირველ რიგში, უნდა აღვნიშნოთ, რომ მასწავლებლობა საკმაოდ საპასუხისმგებლო პროფესიაა, რადგან ყველა მშობელი, რომელიც ამ ადამიანებს საკუთარი შვილების აღზრდას ანდობს, ცდილობს დარწმუნდეს, რომ არჩევანში ნამდვილად არ შემცდარა.

თუმცა, საუკეთესოთა შორისაც არსებობენ საუკეთესოები, რომლებიც პროფესიული უნარ-ჩვევების გარდა, განსაკუთრებული კრეატიულობითაც არიან დაჯილდოებული და ამ ნიჭს ყოველდღიურ სასაწავლო პროცესშიც, ბავშვებთან ურთიერთობისას იყენებენ.

აი, ისინიც:

1. ეს მასწავლებელი ბავშვებს 2Pac-ის სიმღერებით ინგლისურს ასწავლის

დარეჯან გურასაშვილი ინგლისურის მასწავლებელია და საკუთარ მოსწავლეებს უცხო ენას საკმაოდ ორიგინალური ხერხით ასწავლის. გაკვეთილზე, რომლის ამსახველი ვიდეოც პედაგოგმა თავისი ფეისბუქის გვერდზე გამოაქვეყნა, ბავშვებთან ერთად 2Pac-ის სიმღერებს უსმენს და მღერის.

დიახ, ყველაფერი სწორად წაიკითხეთ. მასწავლებელი საკუთარი სწავლების მეთოდის პლიუსებზეც საუბრობდა და აღნიშნა, რომ ბავშვებმა ამ გზით რამდენიმე არაწესიერი ზმნა და მარტივი წარსული დროის კითხვითი ფორმის წარმოება 10 წუთში ისწავლეს.

2. ამ მასწავლებელმა კი საკლასო ოთახი ჰოგვარტსს დაამსგავსა

გარდა იმისა, რომ სტასი ლაბი წლებია მასწავლებლად მუშაობს, ასევე ჰარი პოტერის გულმხურვალე ფანია. ამას მის მიერვე ტვიტერზე გავრცელებული ვიდეოდან ვიგებთ, რომელიც ჰოგვარტსად გადაქცეულ საკლასო ოთახს ასახავს.

კითხვაზე თუ როგორ გადააქცია ერთ დროს მოსაწყენი საკლასო ოთახი ყველა ბავშვისთვის ოცნების ადგილად, ამერიკელი მასწავლებელი, აი, ასე პასუხობს: "საჭირო ინვენტარის შესაგროვებლად ვიყენებდი ფეისბუქის სხვადასხვა ჯგუფებს, ნივთებს ვეძებდი სუპერმარკეტებში, ძველმანების ბაზრობებზე, ბევრი რამ უფასოდაც კი გადმომცეს".

მასწავლებელი იმასაც აღნიშნავს, რომ ყველაზე მეტად ის მომენტი უყვარს, როდესაც მისი მოსწავლეები პირველად შემოდიან საკლასო ოთახში და გაოცებასა და სიხარულს ვერ მალავენ.

3. ეს მასწავლებელი ბავშვებს დილაობით ტაშით, ხელის ჩამორთმევით ან ჩახუტებით ხვდება

რამდენიმე თვის სოციალურ ქსელში ქართველი მასწავლებლის, ერეკლე აბაშმაძის ვიდეო გავრცელდა, რომელსაც მაშინვე უამრავი დადებითი გამოხმაურება მოჰყვა.

საქმე ის არის, რომ ერეკლე ბავშვებს დილაობით ნამდვილ დღესასწაულს უწყობს და მისალმებისას მათ ტაშის დაკვრის, გულის ჩვენების, ხელის ჩამორთმევის ან ჩახუტების შესაძლებლობა აძლევს.

როგორც ვიდეოში ხედავთ, ბავშვებს ძალიან მოსწონთ კრეატიული მასწავლებლის იდეა და ამ გამოწვევასაც სიამოვნებით ართმევენ თავს.

4. ამ მასწავლებელმა ბავშვებისთვის ყურსასმენების შესანახი გააკეთა

ყველა მოსწავლემ იცის, რომ გაკვეთილზე ზედმეტი ნივთები მას ყურადღების მოკრებაში ხელს შეუშლის. ეს კარგად იცის ამბერმაც, რომელიც აშშ-ში, ერთ-ერთი საჯარო სკოლაში ასწავლის.

მასწავლებელმა ზედმეტი ნივთების ორგანიზებულად შესანახად სპეციალური საკიდი შექნა, რომელსაც ბევრი ჯიბე და მათ თავზე წაწერილი ბავშვების სახელებია გამოსახული. ახლა უკვე ყველა პატარამ იცის, რომ სანამ სწავლით არიან დაკავებული, მათი საყვარელი ნივთები უსაფრთხო ადგილას ინახება.

5. ამ მასწავლებელს სწავლის პირველ დღეს ბავშვების გაცნობის ორიგინალური მეთოდი აქვს

ლელა ტეფნაძე თბილისის მწვანე სკოლის გამოცდილი მასწავლებელია და კარგად იცის, რომ სწავლის პირველ დღეს ერთმანეთის გასაცნობად ბავშვებს პატარა ბიძგი ყოველთვის სჭირდებათ.

სწორედ ამიტომ, ლელამ პირველი დღისთვის საკმაოდ ორიგინალური რამ მოიფიქრა — "მოდი, გავიცნოთ ერთმანეთი". აქტივობა, რომელიც ცოტათი თამაშსაც ჰგავს, ბავშვებს სხვადასხვა ფერის ტკბილეულის შერჩევისა და შესაბამისი კითხვის დასმის საშუალებასაც აძლევს.

6. განელი მასწავლებელი კი კომპიუტერულ პროგრამებს ხატვით ასწავლიდა

ფოტო: boredpanda

არც ისე დიდი ხნის წინ, განელი პედაგოგის სწავლების უცნაურმა მეთოდმა მსოფლიო გაოგნებული დატოვა.

ავორა კვადვო კომპიუტერულ პროგრამებს ბავშვებს არც მეტი, არც ნაკლები დაფაზე ხატვით ასწავლიდა. ამის მიზეზი კი სკოლაში არარსებული ინფრასტრუქტურა იყო.

"ყველა მასწავლებელს ბავშვებისთვის ცოდნის გაზიარების საკუთარი გზა აქვს, დაფაზე ხატვა კი სწავლების ჩემებური ხერხია", - ამბობდა ის.

ამ ამბავს ბედნიერი დასასრული აქვს, რადგან ამ გულისამაჩუყებელი ისტორიის ელვის სისწრაფით გავრცელების შემდეგ, განელ მასწავლებელსა და მის მოსწავლეებს საჩუქრად ახალი კომპიუტერები გადასცეს.

7. ამ მასწავლებელმა ხელნაკეთი სათავსო გააკეთა

თუ მასწავლებელი ხართ, ან ოდესმე გახდებით და საკლასო ოთახში საკმარისი სივრცე არ გექნებათ, მაშინ ამერიკელ მასწავლებელს ლიზა მარის უნდა მიბაძოთ.

ქალმა კლასში არასაკმარისი სათავსოების პრობლემას საკმაოდ კრეატიულად მიუდგა და საკუთარი მაგიდის გვერდით პროდუქტის ჩასალაგებული ყუთებით გაკეთებული, ხელნაკეთი თაროები დადგა.

8. ეს მასწავლებელი კი სკოლაში 580 მოსწავლის ნახატით გაფორმებული კაბით მივიდა

ჩარლი ლეიკი ტეხასელი მასწავლებელია, რომელმაც ერთ დღეს გადაწყვიტა, რომ საკუთარი მოსწავლეების შრომა დაეფასებინა და ასევე მათთვის ხელოვნების სწავლის დამატებითი მოტივაცია მიეცა.

ქალმა თავისი 580 მოსწავლის ნახატი ახალ კაბაზე გადაიტანა და სკოლაში ამ ულამაზესი, ილუსტრირებული სამოსით გამოცხადდა.

"ეს ერთ-ერთი საუკეთესო გზაა, რომ ბავშვებს ხელოვნება შევაყვარო, რადგან მათთვის სახალისოა, როდესაც მათ მასწავლებელს მათივე ნახატებით გაფორმებული კაბა აცვია", — თქვა ჩარლიმ.

9. ეს მასწავლებელი მოუსვენარი ბავშვების დასაშოშმინებლად დაფაზე Avengers: Endgame-ის სპოილერებს წერს

ფოტო: Heroic0 / Reddit

შურისმაძიებლები ჯერ კიდევ უამრავ ადამიანს არ უნახავს. მათ შორის არიან სკოლის მოსწავლეებიც — ეს ერთი შეხედვით უსარგებლო ინფორმაცია, რებეკა შემსონმა გაკვეთილზე ცელქი ბავშვების დასაშოშმინებლად გამოიყენა.

საქმე ის არის, რომ მასწავლებელი ურჩ მოსწავლეებს აფრთხილებს, რომ გაკვეთილზე ცუდად მოქცევის შემთხვევაში Avengers: Endgame-ს დაუსპოილერებს, გაგიკვირდებათ და "მუქარამ" გაამართლა.

აღსანიშნავია, რომ რებეკას მალე მსოფლიოს სხვადასხვა კუთხეში სხვა მასწავლებლებმაც მიბაძეს.

10. ამ მასწავლებელს კი კარგად გამოსდის ძველ და გამოუსადეგარ ნივთებს ახალი სიცოცხლე აჩუქოს

ჯონ რისი ჩვენი სიის ბოლო და ასევე ძალიან კრეატიული მასწავლებელია, რომელიც ახერხებს და ძველ, გამოუსადეგარ ნივთებს სრულიად ახალ სიცოცხლეს შთაბერავს ხოლმე. რაც მთავარია, ეს ნივთები მის საკლასო ოთახში სამუდამოდ იდებენ ხოლმე ბინას.

მოკლედ თუ არ იცოდით, გეტყვით, რომ ყავის ჭიქების ძველი ჩასალაგებელი, შეიძლება საკლასო ოთახში ბევრი სახატავი ნივთის შესანახად გამოგადგეთ.