სუროგაციის გზით დაბადებული ბავშვების მშობლებმა 14 სექტემბრის ღამე ახალშობილებთან ერთად იუსტიციის სახლში გაატარეს. ისინი უკვე მეორე თვეა შვილებისთვის დაბადების მოწმობებს ითხოვენ. სუროგაციის ცენტრ New Life-ის ხელმძღვანელის, მარიამ კუკუნაშვილის თქმით, აქცია ორშაბათს, 16 სექტემბერს 10 საათზე განახლდება.

საქმე ეხება 20-მდე უცხოელ წყვილს აშშ-დან, დიდი ბრიტანეთიდან, გერმანიიდან, ესპანეთიდან, პოლონეთიდან, შვედეთიდან, რომლებიც შვილების ქვეყნიდან წაყვანას ვერ ახერხებენ. სახელმწიფო სერვისების განვითარების სააგენტო მათ განუმარტავს, რომ სუროგაციის პროცესში კანონით განსაზღვრული წესები დაირღვა.

მშობლების აქცია იუსტიციის სახლში გუშინ 13 სექტემბერს დღის 2 საათზე დაიწყო. მარიამ კუკუნაშვილი ფეისბუქზე წერდა, რომ მშობლები არ დატოვებდნენ იუსტიციის სახლს, მანამ სანამ ყველა მათგანი არ აიღებდა დაბადების მოწმობას.

"არც წყალი გვაქვს, არც საჭმელი მაგრამ ჩვენ აქაურობას არ დავტოვებთ სანამ უკლებლივ ყველა დაბადების მოწმობა არ იქნევა", — წერს მარიამ კულულაშვილი.

სახელმწიფო სერვისების განვითარების სააგენტო განმარტავს, რომ სუროგაციის ხელშეკრულება კვერცხუჯრედის განაყოფიერებამდე, ანუ ემბრიონის მიღებამდე უნდა გაფორმდეს, წინააღმდეგ შემთხვევაში სახელმწიფო ბავშვის დაბადების მოწმობაში მშობლების მონაცემებს არ ჩაწერს. ასეთ დროს მშობლებს ბავშვის ქვეყნიდან გაყვანის უფლება არ აქვთ.