"ამ დღეებში გავაკეთებ განცხადებას პოლიციელების მიერ ჩემი სასტიკი ცემის ფაქტზე" - ეს განცხადება მწერალმა, კოტე კირვალიძემ დღეს, 5 მაისს, თავის Facebook გვერდზე გააკეთა. On.ge-სთან საუბარში კი განმარტა, რომ 3 მაისს პოლიციამ ის და მისი მეუღლე ქუჩაში გააჩერა, ბიოლოგიური ანალიზის ჩაბარება მოსთხოვა, მოგვიანებით კი ის რუსთავის ნარკოლოგიურში სცემეს.

კირვალიძის თქმით, 3 მაისს მან და მისმა ცოლმა ქალაქგარეთ 1 ბოთლი ღვინო დალიეს, ხოლო საღამოს 8 საათისთვის სახლში დასაბრუნებლად ტაქსი გამოიძახეს. მისი განმარტებით, გზაზე ისინი ორმა მანქანამ გააჩერა, რომელთაგან ერთ-ერთი პოლიციის იყო. კირვალიძის თქმით, მანქანაში მსხდომმა პირებმა, რომლებასაც პოლიციის ფორმა არ ეცვათ, მასა და მის მეუღლეს განუცხადეს, რომ განყოფილებაში უნდა გადაეყვანათ:

"ვკითხე, რატომ, რა მიზეზით, რა დავარღვიე, მივდივარ ჩემთვის სახლში. ფეხით ვმოძრაობდით, საქმეც მაგაშია, ტაქსიც ჯერ არ იყო მოსული. არაფერი აგვიხსნეს და გარდაბნის განყოფილებაში გადაგვიყვანეს. იქ არ იყო ნარკოლოგიური და უკან, რუსთავის ნარკოლოგიურში წამოგვიყვანეს. მე განვაცხადე, რომ არ მეშარდვინება და მაქვს უფლება, რომ საერთოდ არ მივცე ეს ჩვენება და თუ მაიძულებთ, მითხარით მაშინ-მეთქი".

კირვალიძის განმარტებით, ამის შემდეგ სამართალდამცავი ორგანოს წარმომადგენლები მას ფიზიკურად გაუსწორდნენ. მისი თქმით, როდესაც მან მათ უთხრა, რომ არის მწერალი და არასამთავრობო ორგანიზაციის წარმომადგენელი, უარესად დაუწყეს ცემა:

"ფანჯარა ღია იყო და ჩემს მეუღლეს გარეთ ესმოდა ჩემი ხმა. ექიმებიც იყვნენ მეორე ოთახში და ვითომ არ ესმოდათ [ჩემი ხმა]. საბოლოოდ მომიწია შარდის ჩაბარება, ჩემმა მეუღლემ კი თავიდანვე ჩააბარა. დაჟეჟილობები მაქვს თავზე, რამდენჯერმე მცემეს".

კირვალიძის განმარტებით, აღნიშნული ფაქტის შემდეგ, ის, მეუღლესთან ერთად, სახლში მიიყვანეს. მომდევნო დღეს კი, როდესაც გაიღვიძა, თავს ცუდად გრძნობდა და სასწრაფო დახმარება გამოიძახა:

"სასწრაფოს მოჰყვა პატრული. შემდეგ თვითონ დამიკავშირდნენ და ახლაც მირეკავენ, რომ ჩვენება მივცე".

აღნიშნულ ფაქტთან დაკავშირებით შინაგან საქმეთა სამინისტროში On.ge-ს განუცხადეს, რომ კირვალიძე და მისი მეუღლე ნარკოტიკული ნივთიერების ზემოქმედების ქვეშ იმყოფებოდნენ. ხოლო რაც შეეხება კირვალიძის ცემას, უწყებამ ჩვენთან საუბარში ეს ფაქტი კატეგორიულად უარყო:

"მათი საქმე ადმინისტრაციული წესით სასამართლოში განიხილება. რაც შეეხება ცემას, ჩვენ ამ ფაქტს არ ვადასტურებთ. თუ მათ პრეტენზია აქვთ უნდა მიმართონ შსს-ს შესაბამის დანაყოფს-გენინსპექციას".