ბოიკოტის მიუხედავად, ძველი სახეებით დაკომპლექტებულ ახალ მინისტრთა კაბინეტს ოპოზიციამ ფრაქციების ფორმატში მოუსმინა. პროცედურა დაძაბულობისა და მოულოდნელობების ფონზე წარიმართა. გიორგი გახარიას კითხვები ძირითადად 20-21 ივნისის აქციის დაშლაზე დაუსვეს და პლენარულ სხდომათა დარბაზში სიმღერა "გახარიას უხარია" მოასმენინეს. საბოლოოდ, როგორც ევროპულმა საქართველომ, ისე ნაციონალურმა მოძრაობამ გიორგი გახარიას პასუხებს არ მოუსმინეს და სხდომები დროზე ადრე დაასრულეს.

ამ ფაქტმა პრემიერმინისტრობის კანდიდატისა და შინაგან საქმეთა მინისტრის მოვალეობის შემსრულებლის, გიორგი გახარიას გაღიზიანება გამოიწვია.თავდაპირველად, გახარია ოპოზიციას დაემუქრა და თქვა, რომ გადადგომას არ აპირებს და ნაციონალურ მოძრაობას "დაასრულებს". შემდეგ კი ევროპულ საქართველოს მისთვის მიკროფონის გათიშვის გამო უსაყვედურა.

"პირველი, რაც მინდა გითხრათ, დღეს ეს არის მეორე შეხვედრა და ფაქტია, რომ სხვაობა საერთოდ არ არსებობს. ნაციონალური მოძრაობა უბრალოდ, გაიქცა დარბაზიდან, მათმა ფილიალმა ევროპულმა საქართველომ, უბრალოდ, ჩაიგდო ხელში მიკროფონი. მათ საერთოდ არ აინტერესებდათ პასუხები, მათი მიზანი იყო მხოლოდ და მხოლოდ ტყუილების დაფიქსირება, როგორც თავიანთი პოზიციის და უბრალოდ, ეს იყო გასაოცარი, როდესაც მიკროფონთან პასუხის გაცემის საშუალებას არ იძლეოდნენ", — განაცხადა გიორგი გახარიამ.

მისივე თქმით, ევროპული საქართველო და ენმ "სიცრუეზე დაფუძნებით ცდილობს ჩვენს საზოგადოებაში მოდელირებული რეალობით შექმნას გარკვეული ემოციური დაძაბულობა". გახარია ამბობს, რომ ამით მათ სურთ შექმნას გარკვეული რევოლუციური მოლოდინები, რის საშუალებასაც არ მისცემს.

იუსტიციის მინისტრის მოვალეობის შემსრულებელმა თეა წულუკიანმა თქვა, რომ ოპოზიციაში ისტერიკა დაინახა.

"დავინახეთ მცდელობა, რომ ამ გამარგინალებულმა ძალამ შემოგვთავაზა ქართულ ოცნებას, იყოს შუამავალი ხალხთან. ეს შუამავლობა მათ არ გამოუვათ, რადგან ამის არანაირი ლეგიტიმაცია არ გააჩნიათ", – თქვა წულუკიანმა.

რეგიონული განვითარებისა და ინფრასტრუქტურის მინისტრის მოვალეობის შემსრულებელს მაია ცქიტიშვილს გახარიას შემდეგ ყველაზე ხშირად განიხილავდნენ პლენარულ სხდომაზე მისი სიცილის გამო.

"მე ნამდვილად მეცინება და გამეცინება იმაზე, თუ როგორი უსუსურია ოპოზიცია და რა უნიჭო სპექტაკლებს დგამენ უნიჭო მსახიობებით. ძალიან მეცინება, როდესაც სალომე სამადაშვილი ეროვნული მთავრობის დაბრუნებაზე საუბრობს და როდესაც ასეთივე ტიპის გულმხურვალე შეშფოთებას ვისმენთ იმ ადამიანებისგან, რომლებიც თავად მთელი ამ ხნის განმავლობაში მხოლოდ ძალადობით, ადამიანების ცემითა და მათ შორის ახალგაზრდების მოკვლით მართავდნენ ამ ქვეყანას... ახალგაზრდებს მოვუწოდებ, რომ თუ მათ სურთ ქვეყნის მშენებლობა კონსტრუქციულ დიალოგში შევიდნენ მთავრობასთან", — განაცხადა მაია ცქიტიშვილმა.

მთავრობისთვის ნდობის გამოცხადების პროცედურა ხვალ პატრიოტთა ალიანსისა და ქართული ოცნების ფრაქციებში გაგრცელდება. კვირას კი პლენარულ სხდომაზე კენჭს უყრიან.