ევროპული საქართველოს დეპუტატმა, სერგი კაპანაძემ პრემიერობის კანდიდატ გიორგი გახარიას მოსმენის დაწყებამდე განაცხადა, რომ არ აპირებენ მისი "ვითომ პროგრამის" მოსმენას. მისი თქმით, ეს არასერიოზული იქნება იმის ფონზე, რომ საზოგადოება გახარიას გადადგომას ითხოვს.

"მითუმეტეს არ არის სერიოზული პროგრამა. ერთ დღეში დაწერილი რაღაც დოკუმენტია, რომელიც პოლიტიკური ვითარების გამო იქნა წარმოდგენილი და პოლიტიკური ვითარება არის ის, რომ ივანიშვილმა გადაწყვიტა საზოგადოება გამოიწვიოს იმ შინაგან საქმეთა მინისტრის დაწინაურებით, რომელიც არის პასუხისმგებელი ახალგაზრდების თვალის დათხრაზე", — განაცხადა კაპანაძემ.

გარდა ამისა მან აღნიშნა, რომ მოსმენაზე იმისთვის არ მისულან რომ გახარიას პატივს სცემენ "ან პროფესიონალურად, ან ადამიანურად".

"განსაკუთრებით მას შემდეგ, რაც თავი გამოავლინა და რაც გააკეთა, როგორც ჯალათმა 20 ივნისს. ამ შეხვედრას ვატარებთ იმიტომ, რომ პატივს ვცემთ იმ ადამიანებს, რომლებიც 80 დღე აპროტესტებენ იმას, რაც მოხდა 20 ივნისს და გააჩნიათ კონკრეტული კითხვები", — განაცხადა მან.

კანდიდატ გახარიას ამ ფორმატზე პრეტენზია არ გამოუთქვამს და დათანხმდა კითხვებისთვის პასუხები გაეცა. სხდომა ამ წუთებში მიმდინარეობს.

მანამდე დილით ის ნაციონალური მოძრაობის ფრაქციას შეხვდა. დეპუტატებმა შეხვედრა "გახარიას უხარიას" კლიპის ჩვენებით გახსნეს კითხვების დასმის შემდეგ კი პლენარულ სხდომათა დარბაზი დატოვეს. პასუხად გახარიამ განაცხადა: ახლა რაც ხდება არის ჩვეულებრივი სახე, როგორ იმარჯვებს სიმართლე სიცრუეზე.