"მე ვფიქრობ, რომ სინამდვილეში რაც ახლა ხდება არის ჩვეულებრივი სახე, როგორ იმაჯვებს სიმართლე სიცრუეზე. ჩვენი მიზანი უნდა იყოს, რომ ყოველდღე სიცრუე უნდა ვამხილოთ. სხვა გზა ჩვენ არა გვაქვს", — ასე გამოეხმაურა პრემიერობის კანდიდატი გიორგი გახარია პროტესტის ნიშნად დარბაზიდან ნაციონალური მოძრაობის დეპუტატების გასვლას.

სანამ ნაციონალური მოძრაობა დარბაზს დატოვებდა მათ პრემიერობის კანდიდატს კითხვები დაუსვეს. პირველი კითხვა კი 20-21 ივნისის მოვლენებზე გადაღებული საპროტესტო კლიპით "გახარიას უხარია" დაისვა. კლიპის ჩვენების შემდეგ დეპუტატმა, რომან გოცირიძემ იკითხა: "რატომ ესროლეთ ბავშვებს ტყვია".

ამის შემდეგ ნაციონალური მოძრაობის დეპუტატებმა სხვა კითხვები დასვეს, თუმცა განცხადეს, რომ პასუხების მოსმენას არ აპირებდნენ და დარბაზიდან გავიდნენ.

მათი გასვლის შემდეგ გახარიამ ასევე განაცხადა, რომ 20 ივნისის ღამეს ნაციონალური მოძრაობის დეპუტატები პარლამენტში ისხდნენ და ელოდებოდნენ, თუ როგორ შეიჭრებოდა ხალხი. მისივე თქმით, ეს დეპუტატები ითვლიდნენ იმასაც, რომ მაქსიმალურად მეტი მსხვერპლი ყოფილიყო და ეს პოლიტიკური ნიშნით გამოეყენებინათ.

"ამის საშუალება უბრალოდ არ უნდა მივცეთ კოლეგებო. ეს იქნება ჩვენი ძირითადი ამოცანა", — ამ სიტყვებით დაასრულა გახარიამ გამოსვლა და დარბაზი დატოვა.

გაიგეთ მეტი: