ნაციონალური მოძრაობის დეპუტატი, სალომე სამადაშვილი ამბობს, რომ პარლამენტში მივიდნენ, რათა პრემიერ-მინისტრობის კანდიდატს, გიორგი გახარიას "ქართველი ხალხის წინაშე ყველა დანაშაული შეახსენონ".

"როდესაც გადავწყვიტეთ ბოიკოტი, მოგვმართა ბევრმა მოქალაქემ და გვთხოვეს, მათ ნაცვლად გამოგვეყენებინა შესაძლებლობა და გიორგი გახარიასთვის შეგვეხსენებინა, რატომ არ მიიღებს მას არასდროს ჩვენი ქვეყანა პრემიერ მინისტრად, რომ ის იქნება ბიძინა ივანიშვილის მიერ მართული პრემიერი. ვერ გახდება გახარია იმ ხალხის პრემიერი რომლის სისხლშიც აქვს ხელები ამოთხვრილი... ბატონ გახარიას შეკითხვებს დაუსვამს სასამართლო და პარლამენტის საგამოძიებო კომისია, როდესაც ქვეყანაში აღდგება ეროვნული ხელისუფლება და მოვიშორებთ თავიდან მოსკოვიდან მართულ მარიონეტების თეატრს", — განაცხადა სალომე სამადაშვილმა.

საქართველოს პარლამენტში მთავრობის დამტკიცების პროცედურა 4 სექტემბერს დაიწყო. მინისტრთა კაბინეტის საკომიტეტო მოსმენას ბოიკოტი გამოუცხადეს ევროპული საქართველოსა და ნაციონალური მოძრაობის დეპუტატებმა. ბოიკოტის მიუხედავად ოპოზიციამ გადაწყვიტა, რომ 6 სექტემბერს გახარიას მთავრობას ფრაქციის ფორმატში მოუსმინოს.

ოპოზიციონერი დეპუტატები გიორგი გახარიას პრემიერ-მინისტრად წარდგენას აპროტესტებდნენ. ამ პოსტზე გახარიას წარდგენის შემდეგ პარლამენტთან და ქართული ოცნების ოფისთან რამდენიმე აქცია გაიმართა. აქციებს ერთ-ერთი ორგანიზატორი მოძრაობა #სირცხვილიაა, რომელიც 70 დღეზე მეტია შინაგან საქმეთა მინისტრის პოსტიდან გიორგი გახარიას გადადგომას ითხოვდა.