წნელისში ქართული მხარის საგუშაგოს თავზე საოკუპაციო ბანერი დადგეს და დე ფაქტო სამხრეთ ოსეთის დროშა აღმართეს. დე ფაქტო რეჟიმის განცხადებით, ეს არის "ჰუმანიტარული ოპერაცია" ქართული მხარის "აგრესიული" ქმედებების პასუხად.

როგორც ე.წ. უსაფრთხოების სამსახური განმარტავს, დროშა სპეციალურად აღიმართა ზღვის დონიდან 944,8 მეტრზე, ქართულ საგუშაგოზე მაღლა, რადგან ასე "დომინანტად იქცა საზღვრის იმ მონაკვეთში". მათი თქმით, სასაზღვრო პუნქტი "სტრატეგიულად მნიშვნელოვან სიმაღლეზე" ხელს უშლის ქართულ მხარეს "დაამყაროს კონტროლი სამხრეთ ოსეთის ტერიტორიაზე, წნელისის რაიონში".

ფოტო: დე-ფაქტო სამხრეთ ოსეთის მთავრობის პრესსამსახური

ფოტო: დე-ფაქტო სამხრეთ ოსეთის მთავრობის პრესსამსახური

საოკუპაციო რეჟიმი ამტკიცებს, რომ ეს ქმედება მშვიდობიანი ნაბიჯია და მიზნად ისახავს "ოსეთის მოსახლეობის" დაცვას და არა საქართველოს მოსახლეობის შეშინებას. გარდა ამისა, მათ გზა გაყავთ საგუშაგოს მიმდებარე ტერიტორიაზე "ჰუმანიტარული მისიების გასამარტივებლად".

ფოტო: დე-ფაქტო სამხრეთ ოსეთის მთავრობის პრესსამსახური

ფოტო: დე-ფაქტო სამხრეთ ოსეთის მთავრობის პრესსამსახური

წნელისში საგუშაგოს მშენებლობა ქართულ მხარესა და საოკუპაციო რეჟიმს შორის დაპირისპირების მიზეზი გახდა. დე ფაქტო მთავრობა ამტკიცებდა, რომ სოფელ წნელისის ტერიტორია მათ ეკუთვნით და პოლიციის საგუშაგოს დაშლას მოითხოვდა, რისთვისაც ქართულ მხარეს ულტიმატუმი წამოუყენა და რამდენიმე საათი მისცა. რუსეთმა კი მის მიერვე ოკუპირებულ ტერიტორიაზე მხარეებს თავშეკავებისკენ მოუწოდა.

ქართულმა მხარემ მოთხოვნები არ შეასრულა და საგუშაგო არ დაშალა. პასუხად, დე ფაქტო პრეზიდენტმა, ბიბილოვმა განაცხადა, რომ საქართველოს ომი უნდოდა, მაგრამ ამას არ დაუშვებდნენ და "ჰუმანიტარულ ოპერაციას" დაიწყებდნენ.