ევროპული საქართველო მინისტრთა კაბინეტის საკომიტეტო მოსმენას ბოიკოტს უცხადებს. ამის შესახებ ჟურნალისტებს პარტიის დეპუტატმა, სერგი კაპანაძემ განუცხადა.

"დღეს ივანიშვილის მიერ შემოთავაზებული გახარიას ე.წ. ახალი მთავრობა იწყებს განხილვებს კომიტეტებზე, სადაც ისინი წარმოადგენენ სამთავრობო პროგრამაა. ჩვენ არ ვაპირებთ ამ განხილვაში მონაწილეობა მივიღოთ, რადგან ამ მთავრობაში შეცვლილი არაფერი არ არის. ეს ყველაფერი იყო პოლიტიკური ნაბიჯი ივანიშვილის მხრიდან, რომ გამოეწვია საქართველოს მოსახლეობა. ჩვენ კომიტეტებს არ დავესწრებით და არც არანაირ მინისტრს კითხვას არ დავუსვამთ", — განაცხადა სერგი კაპანაძემ.

ბოიკოტს უცხადებს ნაციონალური მოძრაობაც. დეპუტატი სალომე სამადაშვილი აცხადებს, საკომიტეტო მოსმენები დაიწყო რეგლამენტის დარღვევით, რადგან მოქალაქეების ნაწილს პარლამენტში არ უშვებენ.

"კომიტეტის სხდომები არის საჯარო მოვლენა, აქ მოწალაქეებს საშვის პირობებში დასწრების უფლება აქვთ, დღეს პარლამენტი ჩაიკეტა მოქალაქეებისთვის", — განაცხადა სამადაშვილმა.

მან ქართულ ოცნებას "პარლამენტში შეყუჟული ივანიშვილის ხელისუფლება უწოდა". მისი თქმით, ამ ფონზე რუტინულ მუშაობას აზრი არ აქვს და საზოგადოება სხვა მოქმედებას ელოდება.

"ჩვენ მიგვაჩნია, რომ დღეს როცა ვხედავთ საქართველოს მოქალაქეების პროტესტი გრძელდება პარლამენტის შესასვლელთან, არ გვაქვს უფლება რუტინულ რეჟიმში გაგრძელდეს ივანიშვილის კაბინეტის მოსმენა", — განაცხადა სამადადაშვილმა.

მინისტრობის კანდიდატების მოსმენის პარალელურად პარლამენტთან საპროტესტო აქციას ის მოქალაქეები მართავენ, რომლებიც პარლამენტში არ შეუშვეს.

საქართველოს პარლამენტში მთავრობის დამტკიცების პროცედურა დღეს, 4 სექტემბერს დაიწყო. პირველი მინისტრობის კანდიდატი, რომელსაც გაერთიანებულ კომიტეტზე უსმენენ, საგარეო საქმეთა მინისტრი დავით ზალკალიანია. დღესვე სამთავრობო პროგრამას წარადგენს ჯანდაცვის მინისტრი, ეკა ტიკარაძე და განათლების მინისტრი, მიხეილ ბატიაშვილი.