ერეკლე დეისაძე და თემო ეზუგბაია (Vinda Folio), ერთმანეთს, როგორც მუსიკოსები 2012 წელს დაუკავშირდნენ და ერთობლივი პროექტით, Eko & Vinda Folio მუსიკის შექმნა დაიწყეს.

მათი სადებიუტო ალბომი თერაპია ფრანგულ მუსიკალურ ლეიბლზე, Talitres-ზე გამოვიდა. ამ ლეიბლზე გამოცემულია ისეთი ცნობილი ჯგუფების ალბომები, როგორებიც არიან The National, Motorama, Destroyer, The Walkmen და ა.შ.

ალბომში 10 ტრეკია და ყველა მათგანი ქართულენოვანია. ჩანაწერის ხასიათი მელანქოლიური, "თეთრი" პოსტ-პანკია, მინიმალისტური გიტარით და ჭეშმარიტად პოსტ-პანკური ბას პარტიებით. ტექსტუალური ნაწილი კი საკმაოდ რომანტიული და მელანქოლიურია. აქ თემო ეზუგბაიას (Vinda Folio) მშვიდი ხმა მშვენივრად ერწყმის სასიყვარულო ბალადებს: - "სამსახური დილით / ურჩი მაღვიძარა / მოპარულმა წუთმაც გადაიარა / ფუჭი სიტყვებით სავსე კარადა / სევდა თანდათან შემოიპარა." ამ სიტუაციებში ერეკლე დეისაძე ასევე იდეალურად გრძნობს თავს. მას ყოველთვის გამოსდიოდა ე.წ. love song-ის წერა. თუმცა, მომენტებში მისი წინააღმდეგობრივი ხასიათი იღვიძებს და მეტად აგრესიულ და მძიმე ფონს ქმნის - „მე მიჭირდა თქვენთან — სუნთქვა, ყოფნა, თქვენი მოთმენა! თავში მიდუღს ცხელი ტყვია - არაფერი მსგავსი, მე არ შემიგრძვნია“.

თამამად შეიძლება ითქვას, რომ ეს არის ალბომი სიყვარულზე, ბანალურ ყოველდღიურობაზე, დანაკარგებსა და აღმოჩენებზე. მუსიკალური ატმოსფერო კი თავს აღწევს 90-იანი წლების ქართული ალტერნატიული როკ-ჯგუფების მძიმე და დეპრესიულ ჟღერადობას. ამის მაგივრად აქ მსუბუქი მელანქოლია როგორც სიო, ისე უბერავს.

იმ ეპოქაში, როდესაც ბენდები სტანდარტული ლაინ-აფით თითქოს სულს ღაფავენ, ქართული პროექტი საერთაშორისო წარმატებას აღწევს — მთელ ამ ამბავში, ყველაზე სასიამოვნო მაინც ეს არის. ლეიბლი ტალიტრი ქართველ Indie რომანტიკოსებს დიდ სცენაზე გაბრძოლების საშუალებას აძლევს.

ჩანაწერის ჟღერადობას დიდწილად განაპირობებს ვინდა ფოლიოს ვოკალური და გიტარის პარტიები, რომელიც უფრო რბილ და "სუფთა" ატმოსფეროს ქმნის. ზოგადად, მისი ამ ალბომში ყოფნა ერეკლე დეისაძის სიმძიმეს მნიშვნელოვნად აბალანსებს და გარდა ამისა, სასიხარულოა, რომ ის წინა პლანზეა წამოწეული და ბევრად უკეთესად ჩანს, როგორც შემსრულებელი.

მოუსმინეთ: მე, როგორც ბგერა

თერაპია ერთი დიდი love song-ია, რომელიც თანამედროვე ადგილობრივ სცენას ძალიან სჭირდებოდა. ამ დუეტის სტილისტიკის და მათი ჩვენთვის აქამდე ნაცნობი საზრუნავების და ინტერესების შემდეგ, ასეთ მუსიკას მსმენელი სავარაუდოდ ნაკლებად ელოდა. ამ ალბომში პოლიტიკის და სოციალური კომენტარის ადგილი თითქმის არ დარჩა. თუ არ ჩავთვლით მათი ძველი სიმღერის აგურით ხელში ახალ ვერსიას, რომელიც ამ კომპოზიციის უფრო დარბილებულ გადააზრებას გვთავაზობს.

ჯგუფი კონცერტებს მალე საფრანგეთის ქალაქებში გამართავს — 28 ნოემბერს ლიონში, 1 დეკემბერს პარიზში, 5 დეკემბერს ნანტში და 6 დეკემბერს ტურკუენში.