ყოველი ურთიერთობა სულ მცირე ორ ადამიანს შორის არსებული საერთო კავშირია და მისი ყოველი დეტალი ორივეს თანაბრად ეკუთვნის. ფილმებში მსგავსი ურთიერთობების ასახვისას კი ძირითადად მხოლოდ ერთ მხარეს გვაჩვენებენ — ურთიერთობის მონაწილე რომელიმე ერთი პიროვნების თვალთახედვიდან მოგვითხრობენ ისტორიას.

ალბათ, სწორედ ამ მიკერძოების გადასალახად რეჟისორ ნოა ბაუმბახის ახალი ფილმის - Marriage Story - ტრეილერის ორი ვერსია გამოვიდა: თითო თრეილერში სკარლეტ იოჰანსონისა და ადამ დრაივერის პერსონაჟების ისტორიას ცალ-ცალკე და დამოუკიდებლად ვეცნობით.

თრეილერიდან ვიგებთ, რომ დრაივერისა და იოჰანსონის პერსონაჟებს ოჯახი აქვთ, თითოეული მათგანი კი ცდილობს პასუხი გასცეს კითხვას, თუ რა უყვარს განსაკუთრებით თავის პარტნიორში. ასე ვეცნობით ინდივიდუალურად მათ წარმოდგენებს ერთმანეთზე და ურთიერთობის სიღრმეებშიც ორივეს პოზიციიდან ვიხედებით.

"ეს ფილმი იმ სიყვარულის ისტორიაა, რომელიც თავის თავს ყველაზე მეტად განშორების დროს ააშკარავებს. ამ ორი თრეილერით კი მსურდა წყვილს შორის არსებული ურთიერთობა ორივეს თვალთახედვით მეჩვენებინა, რადგან ყოველ ისტორიას მრავალი მხარე აქვს და ამ ფილმის მიზანიც განსხვავებულ წარმოდგენებში საერთო ჭეშმარიტების პოვნაა", — ამბობს რეჟისორი.

Marriage Story რეჟისორ ნოა ბაუმბახის ნეტფლიქსთან თანამშრომლობის პროდუქტია, რომლის პრემიერაც შემოდგომაზე შედგება. მას შემდეგ, რაც წელს Avengers: Endgame-ში სკარლეტ იოჰანსონის გმირი გამოვიტირეთ, ამჯერად მას სულ სხვა ამპლუაში შევხვდებით, ისევე, როგორც ადამ დრაივერს: ჯიმ ჯარმუშის კომედიური ფილმის, The Dead Don’t Die-ს შემდეგ მას პირდაპირ ოჯახურ დრამაში ვიხილავთ. ჰოლივუდის ამ კაშკაშა ვარსკვლავებთან ერთად ფილმში ასევე თამაშობენ ლორა დერნი, ალან ალდა და რეი ლიოტა.

ფილმის პრემიერა ვენეციის კინოფესტივალზე, 29 აგვისტოს შედგება, ნეტფლიქსის მომხმარებელი კი მის ნახვას 2019 წლის შემოდგომაზე შეძლებს.