ფიუდიფაიმ, იგივე ფელიქს არვიდ ულფ ჩელბერგმა, იუთუბზე 100 მლნ გამომწერს გადააჭარბა. თუმცა, ის ყველაზე ბევრგამომწერიანი არხის ტიტულის მფლობელი აღარაა, მას შემდეგ, რაც ინდურმა გასართობმა კომპანიამ, T-Series, იუთუბზე ბოლივუდის ფანების მთელი არმიას მოუყარა თავი და 109 მილიონ გამომწერს მიაღწია.

იმავე დღეს, როცა შვედმა იუთუბერმა 100 მილიონი გამომწერი აღნიშნა, ფანებმა მობილიზება გამოაცხადეს და ის ბონუსად 300 ათასი გამომწერით "დააჯილდოვეს", რაც ნიშნავს, რომ ფიუდიფაის ახლა 100 300 000-ზე მეტი გამომწერი ჰყავს.

ფიუდიფაიმ, რომელმაც რამდენიმე დღის წინ ყოფილ იუთუბერზე, მარზია ბისოგნინზე იქორწინა, მილოცვა თავად YouTube-სგანაც მიიღო:

"იქორწინა მარზიაზე;
კიდევ უფრო შეგვაყვარა მაინკრაფტი;
დააგროვა 100 მილიონი გამომწერი;
საოცარი თვე გაქვს და გილოცავთ".

ფიუდიფაი კონტროვერსულ სიტუაციებში რამდენჯერმე აღმოჩნდა. ის პოსტავდა ვიდეოებს ანტისემიტური ხუმრობებით და ნაცისტური კადრებით. მსროლელმა, რომელიც პირდაპირ ეთერში გადასცემდა ახალი ზელანდიის მეჩეთებში თავდასხმას, მაყურებლებს მოუწოდა ფიუდიფაის არხი გამოეწერათ. იუთუბერის მიერ დაქირავებულ ორ კაცს მის ვიდეოეში ტრანსპარანტი ეჭირათ, წარწერით "სიკვდილი ებრაელებს".

ფიუდიფაიმ ვიდეოები მოგვიანებით წაშალა, ბოდიში მოიხადა და თქვა, რომ მისი ხუმრობები შეურაცხმყოფელი იყო. მან ასევე თქვა, რომ საშინლად გრძნობდა თავს, როცა მსროლელმა, რომელმაც 51 ადამიანი შეიწირა, მისი სახელი ახსენა.

ყველაზე მეტგამომწერიანი იუთუბერის პოზიციას PewDiePie ექვსი წლის განმავლობაში არ თმობდა.