შინაგან საქმეთა სამინისტროს განცხადებით, ოჯახში ძალადობისა და მუქარის ბრალდებით, წარსულში არაერთგზის ნასამართლევი პირი დააკავეს. გამოძიების ვერსიით, ბრალდებული ცოლს სიტყვიერ და ფიზიკურ შეურაცხყოფას სისტემატურად აყენებდა, მოკვლით ემუქრებოდა მათსავე 5 წლის შვილსა და ცოლის ახლო ნათესავებს.

შსს-ს ინფორმაციით, ბრალდებული რამდენიმე დღის განმავლობაში, 1981 წელს დაბადებულ, წარსულში არაერთგზის ნასამართლევი პირის საცხოვრებელ სახლში, გორში იმალებოდა. აღნიშნული პირი პოლიციამ, ასევე, წვრილმანი ხულიგნობისა და სამართალდამცველებისადმი დაუმორჩილებლობის ბრალდებით დააკავა. სამართალდამცველები, ასევე, იკვლევენ მათ მიერ ჩადენილ შესაძლო დანაშაულებრივ ქმედებებსაც. კერძოდ, სხვისი ნივთის დაზიანების ან განადგურებისა და ნარკოტიკების უკანონო შეძენა-შენახვის ფაქტებს.

გამოძიება მიმდინარეობს, როგორც ოჯახში ძალადობისა და მუქარის, ისე, წვრილმანი ხულიგნობისა და სამართალდამცველების კანონიერი მოთხოვნისადმი დაუმორჩილებლობის ფაქტებზე, საქართველოს სსკ-ს 126¹ და 11¹, 151-ე მუხლებით, ასევე, საქართველოს ასკ-ს 166-ე და 173-ე მუხლებით. დანაშაული ორ წლამდე ვადით თავისუფლების აღკვეთას ითვალისწინებს.