რამდენიმე დღის წინ ფეისბუქმა გაავრცელა განცხადება, რომლის მიხედვითაც პლატფორმაზე ჯგუფების სისტემა იცვლება.

მალე ფეისბუქზე მხოლოდ ორი ტიპის — საჯარო და დახურული ჯგუფების შექმნა იქნება შესაძლებელი.

ცვლილების შემდეგ საიდუმლო (secret) ჯგუფები დახურულ (private) ჯგუფებად გადაკეთდება. ჯგუფის მოდერატორს კი ექნება საშუალება გადაწყვიტოს, ხილული უნდა იყოს თუ არა ჯგუფი სხვა ადამიანებისთვის.

ამ ცვლილების მიზანია, რომ პლატფორმა უფრო უსაფრთხო და მარტივი გამოსაყენებელი გახდეს. ფეისბუქმა პლატფორმაზე არასასურველ კონტენტთან საბრძოლველად ორი წლის წინ "უსაფრთხო საზოგადოების ინიციატივა" ჩამოაყალიბა, აღნიშნული ცვლილებაც სწორედ ამ ინიციატივის ფარგლებში ხორციელდება.

ცოტა ხნის წინ გავრცელდა ინფორმაცია, რომ ადამიანების ნაწილი საიდუმლო ჯგუფების ფუნქციას არაკეთილსინდისიერი მიზნებისთვის იყენებდა. მაგალითად, რასიზმის გასავრცელებლად. ორგანიზაცია ProPublica-მ კი ერთი თვის წინ ფეისბუქზე ჯგუფი იპოვნა, სადაც ამერიკელი მესაზღვრეები დაღუპულ მიგრანტებზე ხუმრობდნენ.

აღსანიშნავია, რომ მხოლოდ სახელის ცვლილება პრობლემას ვერ აღმოფხვრის. საიდუმლო ჯგუფები ფეისბუქზე კვლავ იარსებებს.

დახურული ჯგუფები, რომელთა წევრებისა და შეტყობინებების ნახვაც მხოლოდ ჯგუფში გაწევრიანებულ ადამიანებს შეუძლიათ, ორ ტიპად დაიყოფა, ხილული და დამალული. ხილულის შემთხვევაში ჯგუფის მოძებნა ნებისმიერ ადამიანს შეეძლება, თუმცა ჯგუფის შეტყობინებებისა და წევრების შესახებ ინფორმაცია ხელმისაწვდომი არ იქნება.

დამალული დახურული ჯგუფების მოძებნა და ნახვა კი მხოლოდ მასში გაწევრიანებულ ადამიანებს შეეძლებათ.

საჯარო ჯგუფები კი, რა თქმა უნდა, ყველასათვის ხელმისაწვდომი იქნება.

ფეისბუქი არასასურველი კონტენტის აღმოსაჩენად ხელოვნურ ინტელექტსა და მანქანურ დასწავლას იყენებს. ალგორითმის მიერ პრობლემური კონტენტის დაფიქსირებისას თითოეული შემთხვევის განხილვა რეალური ადამიანების მიერ ხდება. თუმცა, ეს სისტემა სრულყოფილებისგან, რა თქმა უნდა, ძალიან შორსაა. ძალადობის შემცველი ჯგუფები კი პლატფორმაზე კვლავ მრავლადაა.