დღეს, 21 აგვისტოს გუგუტიანთკარში, ე.წ. საზღვართან საოკუპაციო რეჟიმის ვერტმფრენმა გადაიფრინა. ტელეკომპანია იმედის ინფორმაციით, ეს MI 8 ტიპის სამხედრო საფრენი აპარატი იყო.

სახელმწიფო უსაფრთხოების სამსახური ფაქტს ადასტურებს და მორიგ პროვოკაციულ ქმედებად აფასებს. მათი თქმით, ეს უკიდურესად აზიანებს ადგილზე არსებულ ისედაც მძიმე მდგომარეობას. მათი თქმით, მომხდარზე ინფორმირებულია ევროკავშირის სადამკვირვებლო მისია და გააქტიურებულია ცხელი ხაზი.

ბოლო რამდენიმე კვირაა საოკუპაციო რეჟიმი გააქტიურებულია. ომის მე-11 წლისთავზე მათ ე.წ. საზღვრის გავლება დაიწყეს სოფელ გუგუტიანთკარში, შედეგად სამმა ადგილობრივმა საცხოვრებელი სახლი და მიწის ნაკვეთები დაკარგა. რამდენიმე დღის წინ კი მათ საოკუპაციო ხაზის მიმდებარე სოფლებიდან საქართველოს 8 მოქალაქე გაიტაცეს. ისინი გუშინ გაათავისუფლეს.