ე.წ. საზღვრის უკანონო კვეთისთვის დაკავებული რვა პირი გათავისუფლებულია. საოკუპაციო რეჟიმმა ისინი დღეს, 20 აგვისტოს ერგნეთის საგუშაგოზე გადასცა ქართულ მხარეს.

საპატრულო პოლიციის დეპარტამენტის ხელმძღვანელმა, ვაჟა სირაძემ ჟურნალისტებთან განაცხადა, რომ დაკავებულების ოჯახებმა ცხინვალის დე ფაქტო სასამართლოს მიერ დანიშნული ჯარიმები გადაიხადეს.

რადიო თავისუფლება თავის წყაროზე დაყრნდობით იუწყება, რომ დაკავებული პირების სანაცვლოდ ქართულმა მხარემ დე ფაქტო სამხრეთ ოსეთის ხელისუფლებას ცხინვალის ციხიდან გამოქცეული პატიმარი გადასცა. აღნიშნული ინფორმაცია, ვაჟა სირაძემ არც უარყო და არც დაადასტურა.

საქართველოს 7 მოქალაქე სოფელ ახალუბნიდან 17 აგვისტოს გაიტაცეს. მეორე დღეს კი სოფელ არცვისტან კიდევ ერთი პირი დააკავეს. მათ ე.წ. საზღვრის უკანონო კვეთა ედებოდათ ბრალად.