ახალი კვლევის მიხედვით, მიკროპლასტმასით დაბინძურებისგან თავისუფალი არც არქტიკაა. მეცნიერები გაოცებულები იყვნენ, როდესაც აღმოაჩინეს, რომ ერთი ლიტრი თოვლი პლასტმასის 10 000-ზე მეტ მიკრონაწილაკს შეიცავდა.

ეს ნიშნავს იმას, რომ დიდი ალბათობით, ადამიანები არქტიკაშიც კი მიკროპლასტმასებით დაბინძურებულ ჰაერს სუნთქავენ. რა შედეგს გამოიწვევს ეს გრძელვაიდან პერსპექტივაში, უცნობია. თანაც, არქტიკა ხშირად მოიხსენიება როგორც ერთ-ერთი უკანასკნელი სუფთა, დაუბინძურებელი გარემო დედამიწაზე.

თოვლის ნიმუშებში პლასტმასის გარდა რეზინის ნაწილაკებიცაა ნაპოვნი. მეცნიერებმა თოვლი შპიცბერგენის კუნძულებზე შეაგროვეს.

"ჩვენ ველოდით, რომ დაბინძურების კვალს ვიპოვიდით. თუმცა ამ რაოდენობის მიკროპლასტმასი ნამდვილი შოკია", — აცხადებს კვლევის ავტორი მელანი ბერგმანი.

მიკროპლასტმასები პლასტმასის ის ნაწილაკებია, რომელთა ზომაც 5 მილიმეტრს არ აღემატება.

ნიმუშებში აღმოჩენილი მიკროპლასტმასები.

ნიმუშებში აღმოჩენილი მიკროპლასტმასები.

ფოტო: ALICE TREVAIL

ბერგმანის თქმით, რამდენადაა საფრთხის შემცველი მიკროპლასტმასები ადამიანის ჯანმრთელობისთვის, ცალსახა არ არის. მეცნიერებმა კვლევის ფარგლებში თოვლის ნიმუშები შვეიცარიიდან და გერმანიიდანაც აიღეს. გერმანიაში აღებული ნიმუშების ნაწილში მიკროპლასტმასების კონცენტრაცია არქტიკაში არსებულსაც აღემატებოდა.

დაზუსტებით ცნობილი არ არის, თუ როგორ აღწევს მიკროპლასტმასები არქტიკაში. ამის ერთ-ერთი მთავარი მექანიზმი ქარი უნდა იყოს, რომელიც პლასტმასის ნაწილაკებს ჰაერში იტაცებს და მათ დიდ მანძილებზე გადააადგილებს.

კვლევა ჟურნალ Science Advances-ში გამოქვეყნდა.